សម្តេចព្រះមហាក្សត្រី ព្រះវររាជមាតា ប្រោសព្រះរាជទានព្រះរាជទ្រព្យ ១០ម៉ឺនដុល្លារ ជួយប្រជារាស្ត្រភៀសសឹកតាមព្រំដែនកម្ពុជា-ថៃ

ភ្នំពេញ៖ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានសព្វព្រះរាជហឫទ័យប្រោសព្រះរាជទាននូវព្រះរាជទ្រព្យចំនួន ១០០.០០០ដុល្លារ (មួយសែនដុល្លារអាមេរិក) ជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដើម្បីចូលរួមជួយដល់ប្រជារាស្ត្រភៀសសឹក ដែលកំពុងជួបការលំបាកតាមបណ្ដោយព្រំដែនកម្ពុជា-ថៃ។

ព្រះរាជទ្រព្យដ៏ឧត្តុង្គឧត្តមខាងលើនេះ ត្រូវបានសម្តេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង នាំយកមកប្រគល់ជូនលោកស្រីបណ្ឌិត អ៊ុក ម៉ាលី អគ្គហេរញ្ញិក កាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅទីស្នាក់ការកណ្តាលកាកបាទក្រហមកម្ពុជា នារសៀលថ្ងៃសៅរ៍ ទី២២ ខែវិច្ឆិកា ឆ្នាំ២០២៥។

ក្នុងឱកាសដ៏ថ្លៃថ្លានោះ លោកស្រីបណ្ឌិត អ៊ុក ម៉ាលី បានប្រគល់សារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានទូលថ្វាយថ្លែងអំណរព្រះរាជគុណដ៏ខ្ពង់ខ្ពស់ជាទីបំផុតចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ចំពោះព្រះរាជទានដ៏ថ្លៃថ្លានេះ។ ខ្លឹមសារសារលិខិតបានគូសបញ្ជាក់ពីព្រះរាជូបត្ថម្ភដ៏ឧត្តុង្គឧត្តមនេះ សម្រាប់ជាជំនួយមនុស្សធម៌បន្ទាន់ដល់ប្រជារាស្ត្រភៀសសឹកដែលខ្វះខាត។

សារលិខិតដដែលបានថ្វាយព្រះពរជ័យថ្វាយព្រះអង្គ និងបួងសួងសុំឱ្យ សម្តេចព្រះមហាក្សត្រី ព្រះវររាជមាតាជាតិខ្មែរ គង់ប្រថាប់ជាមហាម្លប់ដ៏ត្រជាក់សម្រាប់ប្រជារាស្ត្រកម្ពុជាជានិច្ចនិរន្តរ៍។

ឆ្លៀតក្នុងឱកាសនោះដែរ លោកស្រីបណ្ឌិត អ៊ុក ម៉ាលី ក៏បានជម្រាបជូនសម្តេចមហាមន្ត្រី ឧបនាយករដ្ឋមន្ត្រី អំពីព្រះរាជូបត្ថម្ភនូវព្រះរាជទ្រព្យដ៏ឧត្តុង្គឧត្តមពីសំណាក់ សម្តេចព្រះមហាក្សត្រី ព្រះវររាជមាតាជាតិខ្មែរ ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានយកទៅកសាងជាព្រះរាជសមិទ្ធផលនានាជូនដល់ប្រជានុរាស្ត្រងាយរងគ្រោះបំផុតរស់នៅទីជនបទ។ ក្នុងនោះមាន៖

• ផ្ទះចំនួន ២៨ខ្នង (នៅខេត្តព្រះវិហារ ២ខ្នង, ឧត្តរមានជ័យ ៤ខ្នង, កំពង់ឆ្នាំង ៥ខ្នង, កំពង់ស្ពឺ ៥ខ្នង, ពោធិ៍សាត់ ១០ខ្នង, និងកំពង់ធំ ២ខ្នង)។
• អណ្ដូងទឹកស្អាតចំនួន ៣៣អណ្តូង (នៅខេត្តព្រះវិហារ ៣, ឧត្តរមានជ័យ ១៦, មណ្ឌលគិរី ៣, កំពង់ឆ្នាំង ៦, កំពង់ស្ពឺ ២, និងកំពង់ធំ ៣)។
• កន្លែងលាងសម្អាតដៃចំនួន ១៣កន្លែង (នៅខេត្តកំពង់ធំ ៦ និងមណ្ឌលគិរី ៧)។
• បង្គន់អនាម័យ ៤ខ្នង (មាន ១៣បន្ទប់) (នៅខេត្តកំពង់ធំ ៣ខ្នង និងមណ្ឌលគិរី ១ខ្នង)។

សមិទ្ធផលទាំងនេះបានឆ្លុះបញ្ចាំងពីព្រះរាជតម្រិះ និងការយកព្រះទ័យទុកដាក់ខ្ពស់បំផុតរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ទៅលើសុខទុក្ខរបស់ប្រជារាស្ត្រ៕