ក្រសួងការងារ នាំយកឱកាសការងារជាង ៦ពាន់កន្លែង ជូនអតីតពលករត្រឡប់ពីថៃ ក្នុងពិព័រណ៍នៅបន្ទាយមានជ័យ

ខេត្តបន្ទាយមានជ័យ៖ លោក ទុយ ស៊ីផាន់ រដ្ឋលេខាធិការ និងជាតំណាងដ៏ខ្ពង់ខ្ពស់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងពិធីបើក ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ សម្រាប់បងប្អូនអតីតពលករដែលទើបត្រឡប់មកពីប្រទេសថៃ។ ព្រឹត្តិការណ៍នេះបាននាំមកនូវឱកាសការងារប្រមាណជាង ៦,៥០០កន្លែង ព្រមទាំងព័ត៌មានសំខាន់ៗអំពីរបបសន្តិសុខសង្គម (ប.ស.ស.) និងការបណ្តុះបណ្តាលជំនាញបច្ចេកទេសឥតគិតថ្លៃ។

ពិព័រណ៍នេះត្រូវបានរៀបចំឡើងនៅព្រឹកថ្ងៃទី២២ ខែវិច្ឆិកា ឆ្នាំ២០២៥ នៅផ្សារចម្ការតាដោក ស្រុកមង្គលបូរី ខេត្តបន្ទាយមានជ័យ ដោយមានការសហការរវាងទីភ្នាក់ងារជាតិមុខរបរ និងការងារ (NEA) នៃក្រសួងការងារ និងដៃគូពាក់ព័ន្ធជាច្រើនទៀត ដោយមានអ្នកចូលរួមសរុបប្រមាណ ១,០០០នាក់។ ក្នុងនោះ មានសហគ្រាស ក្រុមហ៊ុន និងរោងចក្រចំនួន ២១ បានចូលរួមសម្ភាស និងជ្រើសរើសបុគ្គលិកដោយផ្ទាល់ និងភ្លាមៗ។

ថ្លែងក្នុងឱកាសនោះ លោករដ្ឋលេខាធិការ ទុយ ស៊ីផាន់ បានលើកឡើងពីអត្ថប្រយោជន៍ដ៏សំខាន់នៃការធ្វើការងារក្នុងស្រុក ដោយបញ្ជាក់ថា ពលករនឹងទទួលបានប្រាក់ឈ្នួលសមរម្យទៅតាមជំនាញ មិនមានការបង់ប្រាក់លើបណ្ណការងារ ឬការផាកពិន័យផ្សេងៗឡើយ។

លោករដ្ឋលេខាធិការបានសង្កត់ធ្ងន់ថា ការងារក្នុងស្រុកផ្តល់អត្ថប្រយោជន៍ជាច្រើនដូចជា៖

• ទទួលបាន បណ្ណ ប.ស.ស. សម្រាប់ពិនិត្យ និងព្យាបាលជំងឺដោយឥតគិតថ្លៃ និងមានប្រាក់សោធននៅពេលចូលនិវត្តន៍។
• មានឱកាសជួបជុំក្រុមគ្រួសារបានច្រើន ទាំងនៅក្នុងពិធីបុណ្យទាន និងថ្ងៃឈប់សម្រាកចុងសប្តាហ៍។
• អាចសន្សំសំចៃថ្លៃជួលផ្ទះ ប្រសិនបើធ្វើការជិតផ្ទះ និងនៅសល់ពេលធ្វើកសិកម្ម ឬការងារផ្សេងទៀត។
• ធានាបាននូវសុវត្ថិភាពការងារ និងសុខុមាលភាព។

គួរបញ្ជាក់ថា ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ ដែលរៀបចំដោយ NEA នៃក្រសួងការងារ បានរៀបចំនៅតាមបណ្តាខេត្តចំនួន ១៧លើករួចមកហើយ ហើយក៏បានរៀបចំវេទិកាការងារចំនួន ៥៥៨លើករួចមកហើយផងដែរ៕