ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងលោក Derek YIP ឯកអគ្គរដ្ឋទូតប្រទេសអូស្ត្រាលី ប្រចាំព្រះរាជាណាចក្រកម្ពុជា បានអញ្ជើញជាសហអធិបតីក្នុងពិធីបិទសិក្ខាសាលាស្ដីពី «ភាពជាដៃគូរវាងវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ និងឧស្សាហកម្ម» នារសៀលថ្ងៃទី២១ ខែវិច្ឆិកា ឆ្នាំ២០២៥។ សិក្ខាសាលានេះត្រូវបានសហការរៀបចំឡើងដោយក្រសួងការងារ វិទ្យាស្ថាន Bendigo Kangan (BKI) នៃប្រទេសអូស្ត្រាលី និងក្រុមហ៊ុន RMA Cambodia PLC នៅវិទ្យាស្ថានជាតិបណ្ដុះបណ្ដាលបច្ចេកទេស ដោយមានអ្នកចូលរួមប្រមាណ ៦០០នាក់។
ថ្លែងនៅក្នុងពិធីនេះ លោករដ្ឋមន្ត្រី ហេង សួរ បានគាំទ្រយ៉ាងពេញទំហឹងចំពោះការបង្កើត មជ្ឈមណ្ឌលឧត្តមភាពយានយន្តកម្ពុជា (Automotive Center of Excellence Cambodia – ACE-C) ដែលជាផ្លែផ្កានៃកិច្ចសហប្រតិបត្តិការទ្វេភាគី ក្នុងការពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅកម្ពុជា។ លោកបានគូសបញ្ជាក់ថា មជ្ឈមណ្ឌលនេះនឹងដើរតួនាទីសំខាន់ក្នុងការជំរុញការបង្កើនកម្លាំងជំនាញផ្នែកយានយន្ត ដើម្បីទាក់ទាញ និងលើកកម្ពស់ការវិនិយោគក្នុងវិស័យឧស្សាហកម្មយានយន្ត ស្របតាមចក្ខុវិស័យជាយុទ្ធសាស្ត្ររបស់រាជរដ្ឋាភិបាល។
លោករដ្ឋមន្ត្រីបានបន្តថា ACE-C គឺជាសក្ខីភាពនៃការបោះជំហានទៅមុខដ៏សំខាន់មួយ ក្នុងការលើកកម្ពស់វិស័យ TVET របស់កម្ពុជា ឱ្យឆ្លើយតបទៅនឹងស្តង់ដាអន្តរជាតិ។ ជាងនេះទៅទៀត លោកបានសង្កត់ធ្ងន់ថា កិច្ចសហការរវាងរាជរដ្ឋាភិបាល វិស័យឯកជន និងគ្រឹះស្ថានបណ្ដុះបណ្ដាល គឺជាកត្តាដ៏ចាំបាច់បំផុតក្នុងការកសាងកម្លាំងពលកម្មជំនាញ ដើម្បីឆ្លើយតបទៅនឹងបម្រែបម្រួលក្នុងពិភពការងារនាពេលអនាគត។
ជាមួយឧបករណ៍ និងសម្ភារៈទំនើបៗដែលបានបំពាក់នាពេលនេះ លោករដ្ឋមន្ត្រីបានបង្ហាញនូវការជឿជាក់ថា មជ្ឈមណ្ឌល ACE-C នឹងចូលរួមចំណែកយ៉ាងសកម្ម ក្នុងការកសាងទំនុកចិត្តសម្រាប់ការបណ្ដុះបណ្ដាលមូលធនមនុស្សក្នុងវិស័យយានយន្តនៅកម្ពុជា ឱ្យកាន់តែមានភាពប្រកួតប្រជែងខ្ពស់។ លោកក៏រំពឹងថា មជ្ឈមណ្ឌលនេះនឹងក្លាយជាគំរូសម្រាប់បង្កើតមជ្ឈមណ្ឌលឧត្តមភាពលើវិស័យផ្សេងៗទៀត ក្រោមកិច្ចសហប្រតិបត្តិការរដ្ឋាភិបាលប្រទេសទាំងពីរ។
ចំណែកឯលោក Derek YIP ឯកអគ្គរដ្ឋទូតអូស្ត្រាលី ក៏បានគូសបញ្ជាក់ពីការប្តេជ្ញាចិត្តរបស់ប្រទេសអូស្រ្តាលី ក្នុងការផ្តល់ជំនួយអប់រំ និងធ្វើជាដៃគូដ៏សំខាន់ក្នុងការកសាងការអប់រំបណ្តុះបណ្តាលជំនាញវិជ្ជាជីវៈ និងឧស្សាហកម្មនៅកម្ពុជា។ លោកបានចាត់ទុក ACE-C ជាការឆ្លុះបញ្ចាំងពីភាពជាដៃគូដ៏រស់រវើករវាងរាជរដ្ឋាភិបាល គ្រឹះស្ថានបណ្ដុះបណ្ដាល និងវិស័យឯកជន ក្នុងការធ្វើបរិវត្តកម្មវិស័យ TVET នៅកម្ពុជា។ លោកឯកអគ្គរដ្ឋទូតជឿជាក់ថា ACE-C នឹងជួយឱ្យយុវជនកម្ពុជាត្រៀមខ្លួនសម្រាប់ការចាប់យកបច្ចេកវិទ្យាថ្មីៗក្នុងវិស័យយានយន្ត ក៏ដូចជាពង្រឹងកិច្ចសហប្រតិបត្តិការទ្វេភាគីផងដែរ៕
