ក្រុមប្រឹក្សាអភិវឌ្ឍន៍កម្ពុជា អនុម័តគម្រោងវិនិយោគ ១០ ថ្មី ក្នុងទំហំទឹកប្រាក់ ១១១ លានដុល្លារអាម៉េរិក បង្កើតការងារប្រមាណ ៦,០០០ កន្លែង

ភ្នំពេញ៖ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យ និងពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១០ គម្រោង នារសៀលថ្ងៃទី២១ ខែវិច្ឆិកា ឆ្នាំ២០២៥។ កិច្ចប្រជុំនេះត្រូវបានធ្វើឡើងក្រោមអធិបតីភាពលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការចូលរួមពីតំណាងក្រសួង-ស្ថាប័ន និងរដ្ឋបាលខេត្តពាក់ព័ន្ធ។

គម្រោងវិនិយោគទាំង ១០ នេះ មាន ទុនវិនិយោគសរុបប្រមាណ ១១១ លានដុល្លារអាម៉េរិក និងត្រូវបានរំពឹងថានឹងអាច បង្កើតការងារបានប្រមាណ ៦,០០០ កន្លែង សម្រាប់ប្រជាពលរដ្ឋ។

គម្រោងទាំង ១០ រួមមាន៖

• វិស័យឧស្សាហកម្ម (៩ គម្រោង): វិនិយោគលើការផលិតប្រេងកៅស៊ូ, ផលិតចំណីសត្វ, ផលិតខ្សែអំពូលភ្លើងលម្អគ្រប់ប្រភេទ, ផលិតដើមណូអែល គ្រឿងលម្អ និងគ្រឿងបន្លាស់ដើមណូអែលគ្រប់ប្រភេទ, តុក្កតាណូអែល និងគ្រឿងតុបតែងលម្អសម្រាប់ពិធីបុណ្យណូអែល, ផលិតផលិតផលធ្វើពីប្លាស្ទិក (បន្ទះរក្សាកម្តៅ បន្ទះការពារសំឡេង កម្រាលការពារជង្គង់ និងកម្រាលហាត់យូហ្គា), ផលិតសម្ភារៈសត្វចិញ្ចឹម និងសម្ភារៈបន្ទាប់បន្សំ, និងផលិតទូកខ្យល់ ទូកកៃយ៉ាក់ តង់ កៅអី សាឡុង និងសម្ភារៈបោះជំរំបន្ទាប់បន្សំពីប្លាស្ទិក។
• វិស័យហេដ្ឋារចនាសម្ព័ន្ធ (១ គម្រោង): ផ្តោតលើការបង្កើតផែស្ងួត។

គម្រោងវិនិយោគទាំង ១០ ខាងលើនេះ បានបោះទីតាំងនៅក្នុងខេត្តសំខាន់ៗមួយចំនួន រួមមាន ខេត្តតាកែវ កំពង់ស្ពឺ ព្រៃវែង កំពត និងព្រះសីហនុ៕