ខេត្តពោធិ៍សាត់៖ គម្រោងអភិវឌ្ឍន៍ ទំនប់អាងទឹកលេខ២ ដែលមានទីតាំងស្ថិតនៅលើស្ទឹងប្រម៉ោយ ក្នុងឃុំរកាត ស្រុកភ្នំក្រវាញ ខេត្តពោធិ៍សាត់ ត្រូវបានរំពឹងថានឹងក្លាយជា អាងស្តុកទឹកដែលមានសមត្ថភាពធំជាងគេបំផុត នៅព្រះរាជាណាចក្រកម្ពុជា ដោយអាចស្តុកទឹកបានប្រមាណ ៨៦០ លានម៉ែត្រគូប។
គិតត្រឹមចុងខែវិច្ឆិកា ឆ្នាំ២០២៥ គម្រោងដ៏មហិមានេះបានសម្រេចការអនុវត្តសាងសង់បានប្រមាណ ៤០% ហើយ។ គម្រោងនេះបានចាប់ផ្តើមអនុវត្តក្នុងខែមករា ឆ្នាំ២០២៥ និងគ្រោងបញ្ចប់ជាស្ថាពរនៅក្នុងខែធ្នូ ឆ្នាំ២០២៧។
អត្ថប្រយោជន៍ដ៏សំខាន់ទាំង ៤ នៃគម្រោងទំនប់អាងទឹកលេខ២
ទំនប់អាងទឹកលេខ២ នឹងផ្ដល់នូវអត្ថប្រយោជន៍ដ៏សំខាន់ និងទូលំទូលាយសម្រាប់សេដ្ឋកិច្ច និងសង្គមជាតិ រួមមាន៖
- ការផ្គត់ផ្គង់ទឹក និងស្រោចស្រពកសិកម្ម: អាងនេះអាចស្តុកទឹកបាន ៨៦០ លានម៉ែត្រគូប ដែលមានសមត្ថភាពស្រោចស្រពលើផ្ទៃដីកសិកម្មសរុបចំនួន ២៦២,៥០០ ហិកតា។ នេះនឹងផ្តល់ទឹកប្រើប្រាស់គ្រប់គ្រាន់ និងពង្រីកវិសាលភាពវិស័យកសិកម្មបន្ថែមទាំងក្នុងរដូវប្រាំង និងរដូវវស្សា។
- ការកាត់បន្ថយគ្រោះទឹកជំនន់: អាងស្តុកទឹកនេះនឹងដើរតួនាទីយ៉ាងសំខាន់ក្នុងការ កាត់បន្ថយការជន់លិចលង់ នៅផ្នែកខាងក្រោមទំនប់ ក្នុងភូមិសាស្ត្រខេត្តពោធិ៍សាត់ ដែលតែងតែបង្កគ្រោះមហន្តរាយកន្លងមក។
- ការការពារហេដ្ឋារចនាសម្ព័ន្ធ: តាមរយៈការគ្រប់គ្រងលំហូរទឹក គម្រោងនេះនឹង បញ្ចៀសបាននូវការខូចខាត ប្រព័ន្ធធារាសាស្ត្រ និងហេដ្ឋារចនាសម្ព័ន្ធនានា ដែលជាធម្មតាបង្កឡើងដោយទឹកជំនន់។
- សក្តានុពលទេសចរណ៍: តំបន់ជុំវិញទំនប់អាងទឹកនឹងក្លាយជា តំបន់ទេសចរណ៍ធម្មជាតិដ៏មានសក្តានុពល ដែលនឹងរួមចំណែកដល់ការអភិវឌ្ឍសេដ្ឋកិច្ចមូលដ្ឋាន និងការបង្កើតឱកាសការងារ៕
