ពុំមានគម្រោងសាងសង់ផ្លូវកាត់សមុទ្រពីវៀតណាម រំលោភកិច្ចព្រមព្រៀងដែនទឹកឆ្នាំ១៩៨២ ដូចការផ្សព្វផ្សាយនោះទេ

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៤ ខែវិច្ឆិកា ឆ្នាំ២០២៥ នេះ បានចេញសេចក្ដីថ្លែងការណ៍ជាផ្លូវការមួយ ដើម្បីបំភ្លឺជុំវិញការផ្សព្វផ្សាយព័ត៌មាននៅក្នុងបណ្តាញសង្គមថ្មីៗនេះ ដែលអះអាងថា វៀតណាមកំពុងតែអនុវត្តគម្រោងសាងសង់ផ្លូវកាត់សមុទ្រ។

ឆ្លើយតបនឹងការសាកសួររបស់អ្នកសារព័ត៌មាន អំពីការផ្សព្វផ្សាយក្នុងបណ្តាញសង្គមដែលលើកឡើងថា វៀតណាមកំពុងសាងសង់ផ្លូវកាត់សមុទ្រភ្ជាប់ពីកោះទៀនហៃ (Tien Hai) នៃខេត្តអានយ៉ាង (An Giang) ទៅកាន់កោះហ្វូគក់ (កោះត្រល់) ដែលផ្ទុយនឹងកិច្ចព្រមព្រៀងដែនទឹកប្រវត្តិសាស្ត្រកម្ពុជា-វៀតណាម ឆ្នាំ១៩៨២, អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានធ្វើការបញ្ជាក់ថា តាមការបំភ្លឺពី លោកឯកអគ្គរដ្ឋទូតវៀតណាម និងព័ត៌មានផ្តល់ដោយស្ថានទូតវៀតណាមនៅភ្នំពេញ គឺ ពុំមានការសាងសង់ផ្លូវកាត់សមុទ្ររំលោភ នឹងកិច្ចព្រមព្រៀងរវាងប្រទេសទាំងពីរ ដូចការផ្សព្វផ្សាយលើបណ្តាញសង្គមនោះទេ។

ប្រភពដដែលបានឱ្យដឹងថា រូបភាពសំណង់ផ្លូវកាត់សមុទ្រ ដែលត្រូវបានចែកចាយយ៉ាងទូលំទូលាយនៅក្នុងបណ្តាញសង្គម គឺជា សំណង់ផ្លូវចេញពីដីគោកនៃសង្កាត់ហាទៀង (Ha Tien) ខេត្តអានយ៉ាង (An Giang) ទៅកាន់កំពង់ផែពហុបំណងនៃទីក្រុងហាទៀង ដែលសំណង់នេះ ស្ថិតនៅក្នុងទឹកដីវៀតណាម។

ក្រសួងការបរទេស និងសហប្រតិបត្តិការអន្តរជាតិ បានស្នើយ៉ាងទទូចឱ្យសាធារណជន បញ្ឈប់ការចែកផ្សាយព័ត៌មានខុសការពិត នេះជាបន្ទាន់ ដែលអាចបង្កឱ្យមានការយល់ខុស និងធ្វើឱ្យប៉ះពាល់យ៉ាងធ្ងន់ធ្ងរដល់ទំនាក់ទំនងមិត្តភាពដ៏ល្អប្រសើររវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម៕