កម្ពុជាទទួលបានកម្ចី ៥០ លានដុល្លារពី ADB ដើម្បីពង្រឹងហេដ្ឋារចនាសម្ព័ន្ធហិរញ្ញវត្ថុឌីជីថល

ភ្នំពេញ៖ ធនាគារអភិវឌ្ឍន៍អាស៊ី (ADB) បានសម្រេចជាផ្លូវការនូវការអនុម័តកម្មវិធី និងកម្ចីផ្អែកលើគោលនយោបាយមានតម្លៃ ៥០ លានដុល្លារអាមេរិក ដើម្បីពង្រឹងវិស័យហិរញ្ញវត្ថុនៅកម្ពុជា។ ឥណទាននេះនឹងផ្តោតសំខាន់ទៅលើការលើកកម្ពស់គ្រឹះស្ថានធនាគារ គ្រឹះស្ថានដែលមិនមែនជាធនាគារ ហេដ្ឋារចនាសម្ព័ន្ធហិរញ្ញវត្ថុឌីជីថល និងការកសាងសមត្ថភាពហិរញ្ញវត្ថុប្រកបដោយនិរន្តរភាព។

យោងតាមសេចក្ដីប្រកាសព័ត៌មានរបស់ធនាគារ ADB នៅព្រឹកថ្ងៃទី២៤ ខែវិច្ឆិកា ឆ្នាំ២០២៥ បានឲ្យដឹងថា កម្មវិធីអភិវឌ្ឍហិរញ្ញវត្ថុប្រកបដោយបរិយាបន្ន និងនិរន្តរភាពនេះ មានគោលបំណងលើកកម្ពស់សមត្ថភាព ស្ថិរភាព និងការអនុវត្តប្រតិបត្តិការរបស់វិស័យហិរញ្ញវត្ថុ។ សកម្មភាពនេះធ្វើឡើងក្នុងគោលដៅជំរុញកំណើនសេដ្ឋកិច្ចរបស់កម្ពុជា ប្រកបដោយបរិយាបន្ន និងភាពធន់ ទោះបីជាវិស័យហិរញ្ញវត្ថុរបស់កម្ពុជាមានការរីកចម្រើនគួរឱ្យកត់សម្គាល់ក្តី ការអភិវឌ្ឍបន្ថែមគឺចាំបាច់ ដើម្បីជំរុញសក្តានុពលពេញលេញរបស់ប្រទេស។

លោក Anthony Gill នាយកស្តីទីរបស់ ADB ប្រចាំកម្ពុជា បានលើកឡើងថា ដំណើររបស់កម្ពុជា ឆ្ពោះទៅរកកំណើនប្រកបដោយបរិយាបន្ន និងនិរន្តរភាព បានចាក់ឫសក្នុងចក្ខុវិស័យរបស់ប្រទេស ដើម្បីក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

នាយកស្តីទីរូបនេះបានអះអាងបន្ថែមថា៖ «តាមរយៈការវិនិយោគលើកម្មវិធីនេះ ADB គាំទ្រកម្ពុជាក្នុងការពង្រឹងសមត្ថភាព ស្ថិរភាព និងការអនុវត្តប្រតិបត្តិការវិស័យហិរញ្ញវត្ថុរបស់ប្រទេស កសាងមូលដ្ឋានគ្រឹះសម្រាប់កំណើនដែលធន់ ពង្រីកបរិយាបន្នហិរញ្ញវត្ថុ និងជំរុញសក្តានុពលវិស័យឯកជន។ តាមរយៈការពង្រឹងប្រព័ន្ធអេកូហិរញ្ញវត្ថុប្រកបដោយថាមពល និងបរិយាបន្ន ADB មានគោលបំណងផ្តល់អំណាចដល់ស្ថាប័នអាជីវកម្ម ទាក់ទាញការវិនិយោគ និងធានាថាវិបុលភាពគ្របដណ្ដប់គ្រប់ជ្រុងនានាក្នុងសង្គម»។

បើតាមលោក Anthony Gill ដំណាក់កាលដំបូង នៃកម្មវិធីដែលបានអនុម័តនេះ នឹងផ្តោតសំខាន់លើការពង្រឹងបរិយាកាសបទប្បញ្ញត្តិ ស្ថិរភាពហិរញ្ញវត្ថុ សកម្មភាពទីផ្សារ និងការការពារអ្នកប្រើប្រាស់។ លើសពីនេះ វាក៏ផ្ដោតលើការបង្កើតផែនការយុទ្ធសាស្ត្រសម្រាប់បច្ចេកវិទ្យាហិរញ្ញវត្ថុ (FinTech) ក្របខ័ណ្ឌបទប្បញ្ញត្តិសម្រាប់ទ្រព្យឌីជីថល រូបិយបណ្ណគ្រីបតូ និងការផ្ដល់ហិរញ្ញប្បទានទៅវិញទៅមកតាមវិស័យផងដែរ៕