ភ្នំពេញ៖ ព្រះរាជាណាចក្រកម្ពុជាបានសម្រេចបញ្ជូនប្រតិភូ កីឡាករ កីឡាការិនី និងក្រុមគ្រូបង្វឹកសរុប ៣៣៣នាក់ ចូលរួមប្រកួតប្រជែងមេដាយ ក្នុងព្រឹត្តិការណ៍កីឡាស៊ីហ្គេមលើកទី៣៣ ឆ្នាំ២០២៥ ដែលនឹងប្រព្រឹត្តទៅនៅប្រទេសថៃ ចាប់ពីថ្ងៃទី០៩-២០ ខែធ្នូ ឆ្នាំ២០២៥។
ការគូសបញ្ជាក់នេះ ត្រូវបានធ្វើឡើងដោយឯកឧត្ដម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) នៅក្នុងសម្ភាសន៍មួយនាសប្ដាហ៍នេះ។ ក្រោមការអនុញ្ញាតពីរាជរដ្ឋាភិបាល កម្ពុជានឹងចូលរួមលើ ២១ប្រភេទកីឡា ដោយមានកីឡាករ កីឡាការិនី ២២២នាក់ និងមន្ត្រីពាក់ព័ន្ធ ១១១នាក់។
ការសង្កត់ធ្ងន់លើគោលការណ៍អន្តរជាតិ និងសុវត្ថិភាព
ឯកឧត្ដម វ៉ាត់ ចំរើន បានសង្កត់ធ្ងន់ថា ការចូលរួមនេះគឺធ្វើឡើងស្របតាមច្បាប់ និងធម្មនុញ្ញកីឡាអន្តរជាតិ ក្នុងនាមជាសមាជិករបស់សហព័ន្ធកីឡាអាស៊ីអាគ្នេយ៍ ត្រូវតែបំពេញកាតព្វកិច្ចចូលរួមប្រកួតដែលរៀបចំពីរឆ្នាំម្ដង។ ឯកឧត្ដមបានគូសរំលឹកពីគោលការណ៍ចលនាអូឡាំពិក ដែលបញ្ជាក់ថា ការប្រកួតកីឡាមិនមែនជាវេទិកានយោបាយទេ តែជាការប្រកួតប្រជែងបច្ចេកទេសដើម្បីបង្កើតសន្តិភាព និងសុខដុមនីយកម្ម។
ទន្ទឹមនឹងនេះ ឯកឧត្តមអគ្គលេខាធិការ NOCC ក៏បានបញ្ជាក់ដែរថា ប្រតិភូកម្ពុជានឹងទទួលបានការគាំពារពិសេស និងការធានាសុវត្ថិភាពយ៉ាងរឹតបន្តឹងពីសំណាក់ម្ចាស់ផ្ទះថៃ ដោយប្រតិភូទាំងអស់នឹងស្នាក់នៅសណ្ឋាគារតែមួយជុំគ្នានៅក្រុងបាងកក។
ប្រភេទកីឡាដែលកម្ពុជាចូលរួម
ប្រភេទកីឡាទាំង ២១ ដែលកម្ពុជានឹងបញ្ជូនប្រតិភូចូលរួមប្រកួតមានដូចជា៖ អត្តពលកម្ម, ហែលទឹក, ជិះសេះ, គុនដាវ, កាយសម្ព័ន្ធ, យូដូ, តេក្វាន់ដូWT, ទ្រីយ៉ាត្លុង, បាល់ទះ, បាល់ទាត់, ចំបាប់, បញ្ចស៊ីឡាត់, ឃីកបុកស៊ីង, ប៉េតង់, សីដក់, ម៉ូតូទឹក, ការ៉ាតេ, ជឺជីតស៊ូ, វូស៊ូ, បាល់ទាត់លើតុ និងកីឡាអេឡិចត្រូនិក។
គួរបញ្ជាក់ថា កម្ពុជាធ្លាប់បានរៀបចំធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣ កន្លងទៅ ដោយទទួលបានជោគជ័យដ៏ត្រចះត្រចង់ ជាមួយនឹងការបំបែកកំណត់ត្រាដណ្ដើមបានមេដាយសរុប ២៨២គ្រឿង (មាស ៨១ ប្រាក់ ៧៤ សំរឹទ្ធ ១២៧) និងឈរនៅចំណាត់ថ្នាក់លេខ៤ ក្នុងតំបន់អាស៊ាន៕