នារសៀលថ្ងៃទី២៨ ខែវិច្ឆិកា ឆ្នាំ២០២៥ នៅក្នុងពិធីបើក យុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន នៅខេត្តសៀមរាប ឯកឧត្តម កៅ អ៊ឹមរ៉ន រដ្ឋលេខាធិការក្រសួងព័ត៌មាន បានជំរុញយ៉ាងមុតមាំ។
ឯកឧត្តមរដ្ឋលេខាធិការបានជំរុញដល់លោកគ្រូ អ្នកគ្រូ និងអាណាព្យាបាល ឲ្យបន្ត ផ្សព្វផ្សាយ អប់រំ និងណែនាំយ៉ាងទូលំទូលាយ ដល់សិស្សានុសិស្ស ជាពិសេស យុវជន កុំឲ្យប្រើប្រាស់ បារីអេឡិចត្រូនិក (Vape) និងស៊ីហ្សា។ ឯកឧត្តមបានគូសបញ្ជាក់ថា ការប្រើប្រាស់សារធាតុទាំងនេះអាច ប៉ះពាល់យ៉ាងធ្ងន់ធ្ងរ ដល់សុខភាព និងប្រព័ន្ធប្រសាទរបស់យុវវ័យ ដែលជាទំពាំងស្នងឫស្សីរបស់ជាតិ។
ឯកឧត្តម កៅ អ៊ឹមរ៉ន បានបញ្ជាក់ថា យុទ្ធនាការដ៏មានសារសំខាន់នេះរៀបចំឡើងក្នុងគោលបំណងបំផុសចលនាឲ្យសកម្មនៅក្នុងសហគមន៍ ដើម្បីចូលរួមជាមួយរាជរដ្ឋាភិបាលក្នុងការ អប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀន។ យុទ្ធនាការនេះក៏ជាការជំរុញស្មារតី ចលនាជាតិតែមួយ ដើម្បីចូលរួមផ្សព្វផ្សាយ អប់រំ ឲ្យបានសកម្មគ្រប់មជ្ឈដ្ឋាន អំពី ផលប៉ះពាល់នៃគ្រឿងញៀន ដោយម្នាក់ៗមិនត្រូវពាក់ព័ន្ធ។
ឯកឧត្តមរដ្ឋលេខាធិការបានណែនាំដល់គ្រប់អាជ្ញាធរពាក់ព័ន្ធក្នុងមូលដ្ឋាន និងប្រជាពលរដ្ឋ ជាពិសេស យុវជន ឲ្យចូលរួមទាញយក និងប្រើប្រាស់កម្មវិធីទូរស័ព្ទដៃ NoDrug។ កម្មវិធីនេះដើរតួជាបណ្តុំនៃមេរៀនសំខាន់ៗ និងជាមធ្យោបាយ រាយការណ៍ដ៏សម្ងាត់បំផុត អំពីករណីប្រើប្រាស់ និងចែកចាយគ្រឿងញៀនដ៏មានប្រសិទ្ធភាព។
ឯកឧត្តមបានសង្កត់ធ្ងន់លើការបន្តចូលរួមទប់ស្កាត់ខ្សែរយៈចែកចាយទៅក្នុងសហគមន៍ និងជនបទ ដោយឈរលើ គោលការណ៍ ៣កុំ ១រាយការណ៍ គឺ៖ កុំ ពាក់ព័ន្ធ, កុំ អន្តរាគមន៍, កុំ លើកលែង, និង ត្រូវ រាយការណ៍។
ឯកឧត្តមរដ្ឋលេខាធិការបានលើកទឹកចិត្តឲ្យ វិស័យឯកជន ក្នុងមូលដ្ឋានចូលរួមឲ្យបានផុសផុលលើការងារលើកកម្ពស់ការផ្សព្វផ្សាយអប់រំអំពីបញ្ហាគ្រឿងញៀនតាមគ្រប់មធ្យោបាយ។ ជាមួយគ្នានេះ មាតាបិតា អាណាព្យាបាល លោកគ្រូ អ្នកគ្រូ និងចាស់ព្រឹទ្ធាចារ្យ ត្រូវបន្ត ពន្យល់ អប់រំ ណែនាំជារឿយៗ ជាប់ជាប្រចាំដល់កូនៗ សិស្សានុសិស្ស ឲ្យយល់ដឹងកាន់តែច្បាស់អំពី ផលប៉ះពាល់ជាអវិជ្ជមាន របស់គ្រឿងញៀន។
ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំនៃអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវឲ្យសាធារណជនទូទៅប្រើប្រាស់កម្មវិធីទូរស័ព្ទដៃ NO DRUGS APP ដើម្បីរួមគ្នាពង្រឹង និងពង្រីកវិសាលភាពនៃការផ្សព្វផ្សាយអប់រំឲ្យបានទៅដល់ប្រជាពលរដ្ឋស្ទើរគ្រប់គ្នា។
លោក ឌី រ៉ាដូ អភិបាលរងខេត្តសៀមរាបបានឲ្យដឹងថា ក្នុងរយៈពេល ៩ខែ ឆ្នាំ២០២៥ ខេត្តសៀមរាបសម្រេចបានលទ្ធផលគួរឲ្យកត់សម្គាល់។ ក្រោមកិច្ចសហប្រតិបត្តិការរវាងភាគីពាក់ព័ន្ធ ខេត្តបានផ្សព្វផ្សាយ និងអប់រំអំពីខ្លឹមសារប្រយុទ្ធប្រឆាំងនឹងគ្រឿងញៀនចំនួន ៦ ០៤៤ លើក ដែលមានអ្នកចូលរួមសរុបជិត ៤០ ម៉ឺននាក់។
លោកអភិបាលរងខេត្តក៏បានសំណូមពរដល់គ្រប់ភាគីពាក់ព័ន្ធ ឲ្យសហការ និងចូលរួមចំណែកដល់ការអនុវត្តការងារប្រយុទ្ធប្រឆាំងគ្រឿងញៀនឲ្យបានព្រមៗគ្នា ដើម្បីជីវិត និងសហគមន៍យើង គ្មានគ្រឿងញៀន៕