ធនាគារជាតិនៃកម្ពុជា (NBC) និង គណៈមេធាវីនៃកម្ពុជា (BAKC) បានចុះហត្ថលេខាលើ អនុស្សរណៈនៃការយោគយល់គ្នា (MOU) ដ៏សំខាន់មួយ ស្តីពីកិច្ចសហការលើកកម្ពស់ ការអនុវត្តច្បាប់នៅក្នុងវិស័យធនាគារ។
គោលបំណងចម្បងនៃ MOU នេះគឺដើម្បីបង្កើន ប្រសិទ្ធភាពអនុវត្តច្បាប់ និងបទប្បញ្ញត្តិនៅក្នុងវិស័យធនាគារ ក៏ដូចជាការពង្រឹង និងពង្រីកវិសាលភាពនៃការ បណ្តុះបណ្តាល និង ផ្សព្វផ្សាយច្បាប់ក្រមរដ្ឋប្បវេណី និងច្បាប់ពាក់ព័ន្ធដទៃទៀត ដើម្បីធានាឲ្យបាននូវ សង្គតិភាព និងប្រសិទ្ធភាព ក្នុងការអនុវត្តច្បាប់។
១. គោលដៅ៖ ការពារអតិថិជន និងរក្សាទំនុកចិត្ត
អនុស្សរណៈនេះនឹងរួមចំណែកលើកកម្ពស់ការអនុវត្តច្បាប់ក្នុងវិស័យធនាគារ ដើម្បីធានាឲ្យបាននូវប្រសិទ្ធភាព ព្រមទាំង ការពារផលប្រយោជន៍របស់អតិថិជន និង រក្សាទំនុកចិត្តរបស់សាធារណជន ក្នុងវិស័យធនាគារ។
ការងារដែលត្រូវបន្តអនុវត្តក្រោមវិសាលភាពនៃអនុស្សារណៈនេះរួមមាន៖
- ការអនុវត្ត ហ៊ីប៉ូតែក (Mortgage)
- សន្តតិកម្ម (Succession)
- ការអនុវត្តពាក់ព័ន្ធនឹង មូលប្បទានបត្រ (Cheque)។
២. សិក្សាយន្តការដោះស្រាយវិវាទ និង NPL
ដើម្បីធានាបាននូវប្រសិទ្ធភាពក្នុងការការពារអតិថិជន និងរក្សាទំនុកចិត្ត ស្ថាប័នទាំងពីរនឹងរួមគ្នាសិក្សាលើយន្តការដោះស្រាយវិវាទដូចជា៖
- នីតិវិធីផ្សះផ្សា
- សម្របសម្រួល
- ការចរចារដោយសន្តិវិធី។
កិច្ចសហការនេះនឹងផ្តោតសំខាន់លើការសិក្សាលើលទ្ធភាពដោះស្រាយ ករណីឥណទានមិនដំណើរការ (NPL) ដើម្បី៖
- ការពារសិទ្ធិនិងផលប្រយោជន៍អតិថិជន
- កាត់បន្ថយបំណុលមិនដំណើរការ របស់គ្រឹះស្ថានធនាគារនិងហិរញ្ញវត្ថុ
- ជួយសម្រួលដល់អតិថិជន ក្នុងការដោះស្រាយបញ្ហាទូទាត់បំណុល ឬបញ្ហាហិរញ្ញវត្ថុផ្សេងៗ មុនឈានដល់នីតិវិធីតុលាការ។
៣. លើកកម្ពស់ការប្រើប្រាស់ប្រាក់រៀល
ក្រៅពីចំណុចសហការជាក់លាក់ខាងលើ ស្ថាប័នទាំងពីរ ក៏បានលើកយកចំណុចសំខាន់នៃការ គាំទ្រការប្រើប្រាស់ប្រាក់រៀលសម្រាប់សេវាមេធាវី។ គោលដៅនេះគឺដើម្បី លើកកម្ពស់ការប្រើប្រាស់រូបិយវត្ថុជាតិ និង អធិបតេយ្យភាពសេដ្ឋកិច្ចរបស់កម្ពុជា ដែលជាស្មារតីគាំទ្រ និងជំរុញការប្រើប្រាស់ប្រាក់រៀលក្នុងជីវភាពពិតឲ្យកាន់តែទូលំទូលាយ៕