លោក Christian DesRoches ឯកអគ្គរដ្ឋទូតកាណាដាប្រចាំកម្ពុជា បានជួបពិភាក្សាជាមួយលោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ដើម្បីពិចារណា បង្កើនការវិនិយោគ ទៅលើកសិផលដ៏មានសក្កានុពលរបស់កម្ពុជា ដូចជា ស្វាយចន្ទី កាហ្វេ និងម្រេចកំពត។
១. ស្វាគមន៍ការផ្ដល់បច្ចេកទេស និងជំនាញកសិកម្ម
លោក ឌិត ទីណា បានស្វាគមន៍ចំពោះការពង្រឹង កិច្ចសហប្រតិបត្តិការ របស់កាណាដាលើវិស័យ កសិកម្ម និងកសិពាណិជ្ជកម្ម ជាមួយកម្ពុជា ដើម្បីដកផលចំណេញរួម និងរក្សាទំនាក់ទំនងល្អ។
រដ្ឋមន្រ្តីក្រសួងកសិកម្មបានស្នើទៅកាន់លោក Christian DesRoches ឲ្យពិចារណាលើលទ្ធភាព ផ្តល់បច្ចេកទេស និងជំនាញកសិកម្ម ពីកាណាដា ដល់គ្រឹះស្ថានទាំងបីនៃក្រសួងកសិកម្ម ជាពិសេស រាជបណ្ឌិតសភាវិទ្យាសាស្ត្រកសិកម្ម។ ការផ្ដោតសំខាន់គឺលើការ ស្រាវជ្រាវ និងពិសោធន៍ ដើម្បីពង្រឹងសម្ថភាព និងអភិវឌ្ឍចំណេះដឹងលើជំនាញកសិកម្មនៅកម្ពុជា។
២. ការប្តេជ្ញាចិត្តលើការវិនិយោគប្រកបដោយចីរភាព
កម្ពុជា និងកាណាដា បានប្តេជ្ញាចិត្តក្នុងការធ្វើការរួមគ្នា លើការវិនិយោគវិស័យ កសិកម្ម និងកសិពាណិជ្ជកម្ម ដើម្បីផលប្រយោជន៍ទៅវិញទៅមក ប្រកបដោយ ចីរភាព និងទំនុកចិត្ត ព្រមទាំងបន្តរីកចម្រើនកាន់តែខ្លាំងក្លាទៅមុខ ចំពោះកិច្ចសហប្រតិបត្តិការទ្វេភាគី។
៣. កាណាដា ជាដៃគូពាណិជ្ជកម្មធំទី ៦
គួរជម្រាបថា បច្ចុប្បន្ន កាណាដា គឺជាប្រទេស ដៃគូពាណិជ្ជកម្មធំជាងគេលំដាប់ទី ៦ របស់កម្ពុជា បន្ទាប់ពីប្រទេសចិន អាម៉េរិក វៀតណាម ថៃ និងជប៉ុន។
- ទំហំពាណិជ្ជកម្ម: បើតាមស្ថិតិពីអគ្គនាយកដ្ឋានគយ និងរដ្ឋាករកម្ពុជា ពីខែមករា-កញ្ញា ឆ្នាំ២០២៥ ការផ្លាស់ប្តូរទំនិញរវាងកម្ពុជា-កាណាដា មានទំហំទឹកប្រាក់សរុប ១,០២ ពាន់លានដុល្លារអាម៉េរិក។
- កំណើន: ទំហំនេះកើនឡើង ១៤,៤ ភាគរយ ធៀបនឹងរយៈពេលដូចគ្នាក្នុងឆ្នាំ២០២៤។
- ការនាំចេញកម្ពុជា៖ កម្ពុជានាំចេញមាន ៩៧២,៩២ លានដុល្លារ (កើនឡើង ១៤,៦ ភាគរយ)។
- ការនាំចូលពីកាណាដា៖ កម្ពុជានាំចូលមាន ៥២,៥១ លានដុល្លារ (កើនឡើង ១១ ភាគរយ)។
៤. ផលិតផលសំខាន់ៗ
- ទំនិញនាំចេញទៅកាណាដា៖ ផលិតផល សម្លៀកបំពាក់ ផលិតផលធ្វើដំណើរ ស្បែកជើង កង់ និងគ្រឿងបង្គុំអេឡិចត្រូនិក អគ្គិសនី។
- ទំនិញនាំចូលពីកាណាដា៖ គ្រឿងអេឡិចត្រូនិក និង រថយន្ត ជាដើម៕