ភ្នំពេញ៖ កម្ពុជា និងកាណាដា បានអះអាងសារជាថ្មីនូវការប្ដេជ្ញាចិត្តរបស់ខ្លួន ក្នុងការបង្កើនកិច្ចសហប្រតិបត្តិការពាណិជ្ជកម្មរវាងប្រទេសទាំងពីរឱ្យកាន់តែស៊ីជម្រៅ។
ការអះអាងនេះត្រូវបានធ្វើឡើងនៅក្នុងជំនួបពិភាក្សាការងារមួយនៅថ្ងៃទី២០ ខែវិច្ឆិកា ឆ្នាំ២០២៥ រវាងឯកឧត្តម ឡុង កែមវិចិត្រ អគ្គនាយកនៃអគ្គនាយកដ្ឋានពាណិជ្ជកម្មអន្តរជាតិ និងជាប្រធានដឹកនាំកម្ពុជាក្នុងគណៈកម្មាធិការចរចាពាណិជ្ជកម្មកិច្ចព្រមព្រៀងពាណិជ្ជកម្មសេរីអាស៊ាន-កាណាដា (ACAFTA) ជាមួយលោកជំទាវ Ambra Dickie ឯកអគ្គរដ្ឋទូតកាណាដាប្រចាំកម្ពុជា។
ក្នុងជំនួបដដែលនោះ ភាគីទាំងពីរបានពិភាក្សា និងផ្លាស់ប្តូរទស្សនៈលើទំនាក់ទំនងពាណិជ្ជកម្ម និងវិនិយោគជារួម ទាំងកម្រិតទ្វេភាគី និងតំបន់ ជាពិសេសនៅក្នុងបរិបទនៃការចរចាបន្តបន្ទាប់នៃកិច្ចព្រមព្រៀងពាណិជ្ជកម្មសេរីអាស៊ាន-កាណាដា (ACAFTA)។ ភាគីទាំងពីរបានសង្កត់ធ្ងន់ពីសារៈសំខាន់នៃការជំរុញការចរចា ACAFTA ឆ្ពោះទៅរកការបញ្ចប់ជាសារវន្តស្របតាមកាលកំណត់នៅឆ្នាំ២០២៦។ ឯកឧត្តម ឡុង កែមវិចិត្រ បានគូសបញ្ជាក់ជាថ្មីពីការគាំទ្រឥតងាករេរបស់កម្ពុជាចំពោះវឌ្ឍនភាពបន្តនៃកិច្ចចរចា ACAFTA។
បន្ថែមពីនេះ ភាគីទាំងពីរបានពិភាក្សាអំពីវិស័យសំខាន់ៗដែលមានសក្តានុពលសម្រាប់កិច្ចសហប្រតិបត្តិការរួមមាន៖ ពាណិជ្ជកម្ម, សន្តិសុខស្បៀង, ពាណិជ្ជកម្មអេឡិចត្រូនិក (E-commerce), ថាមពល, ឌីជីថលូបនីយកម្ម (Digitalisation), និងបញ្ញាសិប្បនិម្មិត (Artificial Intelligence) ដោយមានគោលបំណងពង្រឹងកិច្ចសហការក្នុងវិស័យទាំងនេះ និងស្វែងរកឱកាសបន្ថែមទៀតទាំងកម្រិតទ្វេភាគី និងតំបន់៕