ភ្នំពេញ៖ ព្រះរាជាណាចក្រកម្ពុជា និងសាធារណរដ្ឋប្រជាមានិតចិន បានបោះជំហានទៅមុខក្នុងការពង្រឹងកិច្ចសហប្រតិបត្តិការលើវិស័យ ការដាំឈើ និងឧស្សាហកម្មឈើ តាមរយៈការចុះហត្ថលេខាលើអនុស្សរណៈនៃការយោគយល់គ្នា (MoU) កាលពីថ្ងៃទី២១ ខែវិច្ឆិកា ឆ្នាំ២០២៥។
ពិធីចុះហត្ថលេខានេះត្រូវបានធ្វើឡើងនៅក្នុងឱកាសដែលលោក ហម សារាវុធ អនុប្រធានរដ្ឋបាលព្រៃឈើកម្ពុជា ចូលរួមសន្និសីទពិភពលោកស្តីពីឧស្សាហកម្មព្រៃឈើ នៅសាធារណរដ្ឋប្រជាមានិតចិន។ MoU នេះត្រូវបានចុះហត្ថលេខាជាមួយលោក Cai Zhongping អគ្គនាយកនៃនាយកដ្ឋានព្រៃឈើនៃតំបន់ស្វយ័តខេត្តក្វាងស៊ី ប្រទេសចិន។
ពិធីដ៏សំខាន់នេះ ក៏មានការចូលរួមជាសាក្ខីភាពពីសំណាក់លោក ចាន់ ចេស្តា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។ ចំណែកឯភាគីចិនវិញ រួមមានលោកស្រី Sui Guohua អភិបាលរងតំបន់ស្វយ័តខេត្តក្វាងស៊ី និងលោក Li Jinhua អនុរដ្ឋមន្ត្រីរដ្ឋបាលព្រៃឈើជាតិចិនផងដែរ។
បើតាមការបញ្ជាក់របស់រដ្ឋបាលព្រៃឈើ កិច្ចសហប្រតិបត្តិការនេះគឺជាការបោះជំហានបន្ថែមទៀតដែលកើតចេញពីការខិតខំប្រឹងប្រែងរបស់លោក ឌិត ទីណា រដ្ឋមន្រ្តីក្រសួងកសិកម្ម ក្នុងការអភិវឌ្ឍការងារដាំឈើនៅប្រទេសកម្ពុជា។
តាមរយៈអនុស្សរណៈនៃការយោគយល់គ្នានេះ នឹងចូលរួមចំណែកសំខាន់ក្នុងការ៖
- ពង្រឹងទំនាក់ទំនង រវាងកម្ពុជា-ចិន។
- លើកកម្ពស់គុណភាព ប្រភេទឈើដាំ និងឧស្សកម្មឈើ។
- ជំរុញការអភិវឌ្ឍបៃតង តាមបច្ចេកទេសទំនើបថ្មីៗ។
- រួមចំណែកដល់កំណើនសេដ្ឋកិច្ចជាតិ ប្រកបដោយនិរន្តរភាព។
គណៈប្រតិភូកម្ពុជា រំពឹងថាកិច្ចសហប្រតិបត្តិការនេះនឹងនាំមកនូវបច្ចេកវិទ្យាទំនើប និងចំណេះដឹងថ្មីៗ ដើម្បីលើកកម្ពស់វិស័យព្រៃឈើ និងឧស្សាហកម្មកែច្នៃឈើរបស់កម្ពុជា៕