កម្ពុជា-តួកគី កំណត់គោលដៅពាណិជ្ជកម្មទ្វេភាគី ១ ពាន់លានដុល្លារ ជំរុញវិនិយោគលើកសិកម្ម វេចខ្ចប់ និងទេសចរណ៍សុខភាព

ភ្នំពេញ៖ ព្រះរាជាណាចក្រកម្ពុជា និងសាធារណរដ្ឋតួកគី បានប្ដេជ្ញាបង្កើនទំហំពាណិជ្ជកម្មទ្វេភាគីឱ្យដល់ ១ ពាន់លានដុល្លារអាម៉េរិក ខណៈភាគីកម្ពុជាបានស្នើឱ្យតួកគីពិចារណាវិនិយោគបន្ថែមលើវិស័យកសិកម្ម ការកែច្នៃចំណីអាហារ ការវេចខ្ចប់ និងវិស័យសុខាភិបាល។

គោលដៅនេះត្រូវបានប្រកាសឡើងនៅក្នុងកិច្ចប្រជុំគណៈកម្មការសេដ្ឋកិច្ចរួមគ្នាលើកទី៤ (4th Joint Economic Commission meeting) កាលពីថ្ងៃទី៤ ខែវិច្ឆិកា ឆ្នាំ២០២៥ ដែលធ្វើឡើងក្រោមអធិបតីភាពលោកជំទាវ ចម និម្មុល រដ្ឋមន្ត្រីក្រសួងពាណិជ្ជកម្មកម្ពុជា និងលោក Ibrahim Yumakli រដ្ឋមន្ត្រីក្រសួងកសិកម្ម និងព្រៃឈើនៃសាធារណរដ្ឋតួកគី។

ភាគីទាំងពីរបានពិភាក្សាអំពីលទ្ធភាពនៃការពង្រឹងកិច្ចសហប្រតិបត្តិការពាណិជ្ជកម្ម និងវិនិយោគ ដើម្បីជំរុញទំហំពាណិជ្ជកម្មឱ្យដល់គោលដៅដែលបានកំណត់ដោយថ្នាក់ដឹកនាំនៃប្រទេសទាំងពីរ។

លោកជំទាវ ចម និម្មុល បានគូសបញ្ជាក់អំពី ភាពបំពេញគ្នាទៅវិញទៅមកនៃសេដ្ឋកិច្ច និងបានស្នើឱ្យមានការសហការគ្នាយ៉ាងជិតស្និទ្ធលើពាណិជ្ជកម្ម និងការវិនិយោគក្នុងវិស័យអាទិភាពមួយចំនួន រួមមាន កសិកម្ម ការកែច្នៃចំណីអាហារ ការវេចខ្ចប់ ទេសចរណ៍សុខភាព និងបរិក្ខារពេទ្យ។

យោងតាមក្រសួងពាណិជ្ជកម្មកម្ពុជា ភាគីទាំងពីរបានអះអាងជាថ្មីនូវការប្តេជ្ញាចិត្តដ៏រឹងមាំក្នុងការពង្រឹងទំនាក់ទំនង និងធ្វើឱ្យកិច្ចសហប្រតិបត្តិការកាន់តែស៊ីជម្រៅលើគ្រប់វិស័យ តាមរយៈសកម្មភាពដែលបានឯកភាពគ្នាក្នុងកិច្ចប្រជុំ។ វិស័យទាំងនោះរួមមាន ពាណិជ្ជកម្មទំនិញ និងសេវាកម្ម កសិកម្ម រុក្ខាប្រមាញ់ និងនេសាទ អាកាសចរស៊ីវិល ការដឹកជញ្ជូន និងហេដ្ឋារចនាសម្ព័ន្ធ អប់រំ វិនិយោគ ឧស្សាហកម្ម វិទ្យាសាស្ត្រ និងបច្ចេកវិទ្យា ស្តង់ដារហាឡាល់ ធនធានទឹក ទេសចរណ៍ សុខភាព និងការងារ សន្តិសុខសង្គម និងការបណ្ដុះបណ្ដាលវិជ្ជាជីវៈ៕