បណ្តាញរោងចក្រផលិតស្បែកជើងផ្គត់ផ្គង់ម៉ាកយីហោល្បីៗ សន្យាជួយផ្សព្វផ្សាយសក្តានុពលទេសចរណ៍ និងវិនិយោគកម្ពុជា

ភ្នំពេញ៖ បណ្តាញសហគ្រាសផលិតស្បែកជើងធំៗ ដែលកំពុងផលិតឲ្យម៉ាកយីហោល្បីលំដាប់ពិភពលោក ដូចជា Armani, Michael Kors, Marc Jacobs, និង Versace បានប្តេជ្ញាចិត្តចូលរួមចំណែកក្នុងការជួយផ្សព្វផ្សាយសក្តានុពលទេសចរណ៍ និងវិនិយោគរបស់កម្ពុជាទៅកាន់អ្នកទិញ (Buyers) និងបណ្តាញវិនិយោគសកលរបស់ពួកគេ។

ការប្តេជ្ញាចិត្តនេះត្រូវបានធ្វើឡើងដោយលោក Joseph Lin ប្រធានក្រុមហ៊ុន HQ Footwear (Cambodia) Co., Ltd. ក្នុងឱកាសអញ្ជើញចូលជួបសម្តែងការគួរសម និងពិភាក្សាការងារជាមួយ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នៅទីស្តីការក្រសួង កាលពីថ្ងៃទី២៣ ខែវិច្ឆិកា ឆ្នាំ២០២៥។

យោងតាមក្រសួងទេសចរណ៍ កិច្ចប្រជុំនេះមានលក្ខណៈប្រកបដោយផ្លែផ្កា និងចក្ខុវិស័យវែងឆ្ងាយ។ ក្រុមហ៊ុនបានបង្ហាញពីចេតនាចង់ចូលរួមយ៉ាងសកម្មក្នុងការផ្សព្វផ្សាយសក្តានុពលទេសចរណ៍ និងឱកាសវិនិយោគនៅកម្ពុជា ដោយលើកពីចំណុចសំខាន់ៗដូចជា សន្តិភាព ស្ថិរភាពនយោបាយ សណ្តាប់ធ្នាប់សាធារណៈល្អ ការអភិវឌ្ឍគ្រប់វិស័យ និង យន្តការគាំទ្ររបស់រាជរដ្ឋាភិបាលក្នុងការធានាដល់វិនិយោគិន ទៅកាន់បណ្តាញវិនិយោគរបស់ពួកគេទាំងនៅចិន និងទូទាំងពិភពលោក ជាពិសេសដល់អ្នកទិញផលិតផល។

ឯកឧត្តម ហួត ហាក់ បានស្វាគមន៍គំនិតផ្តួចផ្តើមនេះដោយការកោតសរសើរយ៉ាងជ្រាលជ្រៅ និងបានលើកទឹកចិត្តឱ្យមានការបន្តកិច្ចសហប្រតិបត្តិការបន្ថែមទៀត។ ឯកឧត្តមបានស្នើសុំឱ្យក្រុមហ៊ុនជួយផ្សព្វផ្សាយព័ត៌មានពិតប្រាកដអំពីកម្ពុជា និងបានអញ្ជើញក្រុមហ៊ុនឱ្យពិចារណារៀបចំ ដំណើរកម្សាន្តសម្រាប់បុគ្គលិក និងថ្នាក់ដឹកនាំជាប្រចាំ នៅកម្ពុជា។

លើសពីនេះ ឯកឧត្តមរដ្ឋមន្ត្រីក៏បានស្នើឱ្យក្រុមហ៊ុនរៀបចំ ដំណើរទស្សនកិច្ចរបស់អ្នកទិញ (Buyers’ Trips) មកកាន់កម្ពុជា ដើម្បីឱ្យពួកគេអាចយល់កាន់តែច្បាស់អំពីស្ថានភាពពិតប្រាកដរបស់ប្រទេសកម្ពុជា វឌ្ឍនភាពក្នុងវិស័យផ្សេងៗ សក្តានុពលទេសចរណ៍ដ៏សម្បូរបែប និង បដិសណ្ឋារកិច្ចយ៉ាងកក់ក្តៅ របស់ប្រជាជនកម្ពុជា៕