ខេត្តសៀមរាប៖ ផ្សារផលិតផលខ្មែរខេត្តសៀមរាប បាននិងកំពុងបន្តដំណើរការលក់នូវកសិផល និងផលិតផលខ្មែរដែលបានដាំដុះ និងកែច្នៃដោយផ្ទាល់ពីកសិករ និងផលិតករខ្មែរនៅទូទាំងខេត្តសៀមរាប។ ផ្សារនេះដំណើរការលក់នៅរៀងរាល់ ថ្ងៃសៅរ៍ និងថ្ងៃអាទិត្យ ចាប់ពីម៉ោង ៧ ព្រឹក ដល់ម៉ោង ១២ ថ្ងៃត្រង់។
ផ្សារផលិតផលខ្មែរនេះមានទីតាំងស្ថិតនៅ សួនច្បារហាត់ប្រាណជិតមាត់ស្ទឹងសៀមរាប ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប។
សូមបញ្ជាក់ថា ផ្សារនេះត្រូវបានរៀបចំ និងដាក់ឲ្យដំណើរការចាប់តាំងពីឆ្នាំ២០១៩ រហូតមកដល់បច្ចុប្បន្ន ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម។ គម្រោងនេះស្ថិតក្រោមការដឹកនាំ និងការគាំទ្រផ្ទាល់ពី ក្រសួងពាណិជ្ជកម្ម និងការសម្របសម្រួលផ្តល់ទីតាំងរបស់ រដ្ឋបាលខេត្ត ព្រមទាំងមានការអនុវត្តផ្ទាល់ពី មន្ទីរពាណិជ្ជកម្មខេត្តសៀមរាប។
គោលបំណង និងការអំពាវនាវគាំទ្រ
ផ្សារផលិតផលខ្មែរនេះមានគោលបំណងសំខាន់ៗដូចជា៖
- ផ្តល់ឱកាសទីផ្សារបន្ថែម ដល់កសិករ ផលិតករ និងអាជីវករខ្នាតតូច ដែលជាតំណាងពីក្រុមកសិករផលិត។
- តភ្ជាប់ទំនាក់ទំនងទីផ្សារ ឲ្យកាន់តែប្រសើរដល់ក្រុមផលិតដែលអាចរកប្រាក់ចំណូល និងលើកកម្ពស់ជីវភាពរស់នៅរបស់ពួកគេ។
ក្រសួងពាណិជ្ជកម្មបានអំពាវនាវដល់សាធារណជនទូទៅ សូមចូលរួមគាំទ្រ និងប្រើប្រាស់ផលិតផលខ្មែរនៅផ្សារនេះ ដើម្បីរួមចំណែក បង្កើនផលិតភាពផលិតផលក្នុងស្រុក បង្កើនប្រាក់ចំណូល និង លើកស្ទួយជីវភាពកសិករ និងផលិតករខ្មែរ ព្រមទាំងជំរុញការអភិវឌ្ឍសេដ្ឋកិច្ច-សង្គមជាតិឲ្យកាន់តែប្រសើរឡើង៕
