កុំទទួលលុយជំនួស! អគ្គនាយក FHF ព្រមាន៖ ប្រយ័ត្នជាប់គុកដោយសារបទល្មើសឆបោកតាមអនឡាញ

លោក កុក ថា អគ្គនាយកគ្រឹះស្ថាន អេហ្វអេចអេហ្វ ឃែភីថល ម.ក បានប្រាប់ឲ្យដឹងថា ក្នុងករណីមានអ្នកណាម្នាក់ស្នើឲ្យអ្នកជួយ ទទួលលុយផ្ញើចេញពីគណនីធនាគារផ្សេង ដោយសន្យាផ្តល់លុយជា សគុណ នោះ ពុំគួរទទួលជាដាច់ខាត។ លោកបានបញ្ជាក់ថា នេះគឺជាករណីមួយដែលអាចនាំឲ្យអ្នកឈានទៅរកគ្រោះថ្នាក់ ក្នុងបទល្មើសឆបោកតាមប្រព័ន្ធអនឡាញ ជាដើម។

ការលើកឡើងរបស់លោក កុក ថា ធ្វើឡើងក្នុងកម្មវិធី CYBER SECURITY: ជជែកពីសន្តិសុខសាយប័រ ក្រោមប្រធានបទ៖ «ឥទ្ធិពលអាក្រក់នៃការលក់គណនីធនាគារនៅកម្ពុជា»។

១. ហេតុផលមិនគួរទទួលលុយជំនួសដោយមានសគុណ

លោក កុក ថា បានថ្លែងថា៖ «ពុំគួរទទួលនោះទេ ប្រសិនបើមាននរណាម្នាក់ស្នើសុំជួយទទួលលុយ ដែលចូលពីគណនីធនាគារផ្សេង ដោយសន្យាផ្តល់លុយជាការអរគុណ ព្រោះនេះជារឿង គ្រោះថ្នាក់មួយ ដល់យើងជាម្ចាស់គណនី»។

លោកបានពន្យល់ដោយសាមញ្ញថា៖ «ប្រសិនបើអ្នកស្គាល់គ្នាជិតស្និទ្ធ គ្រាន់តែស្នើឲ្យជួយទទួលលុយ ឬដកលុយប៉ុណ្ណឹង គឺមិនអាចនិយាយរឿងផ្ដល់លុយជាការអរគុណនោះទេ។ សាកគិតទៅមើលថា យើងជាអ្នកស្គាល់គ្នាគ្រាន់តែពឹងពរគ្នាបន្តិចបន្តួចឲ្យដកលុយ តើចាំបាច់ទេដែលត្រូវផ្ដល់ជាការសគុណនោះ? គឺស្ដាប់ទៅមិនទំនងនោះទេ»។

២. ហានិភ័យច្បាប់៖ ប្រឈមមុខនឹងជនឧក្រិដ្ឋ

លោកបានបន្ថែមថា សាធារណជនត្រូវ ប្រយ័ត្នឲ្យមែនទែន ព្រោះខ្លាចថាអ្នកដែលវេរលុយចូលគណនីនោះ គឺជា ក្រុមហ៊ុនបទល្មើសអនឡាញ ឬ ឧក្រិដ្ឋជន ដែលប៉ូលីសកំពុងតាមចាប់ ឬបង្កកទ្រព្យសម្បត្តិ។

លោក កុក ថា បានបញ្ជាក់ពីផលវិបាកផ្លូវច្បាប់ថា៖ «ដូច្នេះគេ (សមត្ថកិច្ច) នឹងតាមស្រាវជ្រាវពីបុគ្គលនេះ ហើយប្រសិនបើគេស្រាវជ្រាវឃើញថា យើងជាអ្នកទទួលលុយពីជនឧក្រិដ្ឋនោះ ចង់ ឬមិនចង់ យើងនឹងត្រូវ ប្រឈមមុខច្បាប់មួយរយៈសិន ទម្រាំរកឃើញថា យើងមិនមានពាក់ព័ន្ធ»៕