សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានបង្ហាញការសណ្ដោសអាណិត និងផ្ដល់ផ្ទះមួយខ្នង ព្រមទាំងគ្រឿងឧបភោគបរិភោគ និងសម្ភារប្រើប្រាស់ក្នុងផ្ទះមួយចំនួនទៀត ទៅដល់គ្រួសារយុទ្ធជនពលីក្នុងជម្លោះប្រដាប់អាវុធរយៈពេល ៥ថ្ងៃ រវាងកងទ័ពកម្ពុជា និងកងទ័ពថៃ។
ក្នុងឱកាសអញ្ជើញផ្ដល់ផ្ទះដល់គ្រួសារយុទ្ធជនពលី ស្ថិតក្នុងភូមិព្រែកបេង ឃុំព្រែកសាម៉ាន់ ស្រុកឆ្លូង ខេត្តក្រចេះ នៅថ្ងៃទី២៩ ខែវិច្ឆិកា ឆ្នាំ២០២៥ លោកជំទាវបណ្ឌិត ពេជ ចន្ទមុន្នី បានមានប្រសាសន៍ថា រាជរដ្ឋាភិបាលកម្ពុជា តែងតែយកចិត្តដាក់ ចំពោះគ្រួសារយុទ្ធពលី ដោយ មិនបានបោះបង់អ្នកណាម្នាក់ឲ្យនៅឯកោ បើទោះបីជាគ្រួសាររបស់ពួកគេបានពលីទៅហើយក៏ដោយ។
លោកជំទាវបណ្ឌិត ពេជ ចន្ទមុន្នី បានលើកទឹកចិត្តដល់អ្នកស្រី ពេញ លីណា ដែលជាស្ត្រីមេម៉ាយកូន ៤ នាក់ដែលទទួលបានផ្ទះនេះ ឲ្យ ពង្រឹងកម្លាំងចិត្ត ដើម្បីបន្តចិញ្ចឹមមើលថែកូនៗ ឲ្យបានរៀនសូត្រចប់ចុងចប់ដើម។
លោកជំទាវបានគូសបញ្ជាក់ថា រាជរដ្ឋាភិបាល និងប្រជាពលរដ្ឋខ្មែរនៅគ្រប់ទិសទីនឹងបន្ត ឈរជ្រោមជ្រែង និងផ្ដល់កម្លាំងចិត្ត រួមទាំងការផ្ដល់ ឱកាសអាហារូបករណ៍ ដល់កូនៗរបស់យុទ្ធជនពលី ដោយធានាថាក្រោយពេលរៀនចប់ ពួកគេនឹងមាន ការងារធ្វើសមរម្យ។
ជាមួយគ្នានេះ លោកជំទាវបណ្ឌិតបានជំរុញដល់អ្នកស្រី ពេញ លីណា អាចទៅសិក្សា ជំនាញវិជ្ជាជីវៈ។ លោកជំទាវក៏បានជំរុញទៅដល់ក្រសួងស្ថាប័នពាក់ព័ន្ធ និង ឯកឧត្តម វ៉ា ថន អភិបាលខេត្តក្រចេះ ឲ្យជួយ សម្របសម្រួលរូបគាត់ឲ្យមានការងារធ្វើ ឬបានសិក្សាជំនាញ ដើម្បីអាចចិញ្ចឹមជីវិតបាន។ មួយវិញទៀត ត្រូវបន្តចុះ សួរសុខទុក្ខ និងគិតគូរពីបញ្ហាសុខភាព របស់ពួកគេឲ្យបានជាប់ជាប្រចាំ។
អ្នកស្រី ពេញ លីណា ភរិយាយុទ្ធជនពលីឈ្មោះ ប្រាក់ ពិសិដ្ឋ បានបង្ហាញនូវក្តីសោកស្ដាយចំពោះការបាត់បង់ប្តី ប៉ុន្តែក៏មាន មោទនភាពចំពោះរូបគាត់ ដែលបានលះបង់អាយុជីវិតក្នុងការការពារទឹកដី។
ស្ត្រីមេម៉ាយកូន ៤ នាក់រូបនេះបានថ្លែង អំណរគុណយ៉ាងជ្រាលជ្រៅ ចំពោះសម្ដេចធិបតី និងលោកជំទាវបណ្ឌិត ដែលបានផ្ដល់ ផ្ទះមួយខ្នង នេះជា ជម្រកដ៏ចាំបាច់។ អ្នកស្រីបានប្តេជ្ញាថា នឹងតស៊ូខិតខំចិញ្ចឹមបីបាច់កូនៗ ដើម្បីឲ្យពួកគេបានរៀនសូត្រចប់ និងមានការងារល្អធ្វើ។
គួរបញ្ជាក់ថា ជាហូរហែរសម្ដេចធិបតី ហ៊ុន ម៉ាណែត និងលោកជំទាវបណ្ឌិត តែងតែ គិតគូរជាប្រចាំ ចំពោះគ្រួសារ អតីតយុទ្ធជន និវត្តជន រួមទាំងគ្រួសារយុទ្ធជនពលីថ្មីៗ ក្នុងជម្លោះព្រំដែនកម្ពុជា-ថៃ។ ការគាំទ្រទាំងនោះរួមមានការផ្ដល់ផ្ទះ គ្រឿងឧបភោគបរិភោគ ការជួយសម្របសម្រួលផ្ដល់ការងារ និងការផ្ដល់ អាហារូបករណ៍ ដល់កូនៗរបស់ពួកគេបានសិក្សារៀនសូត្របន្តផងដែរ៕