គណៈរដ្ឋមន្ត្រីជួបប្រជុំពេញអង្គពិភាក្សាលើរបៀបវារៈសំខាន់ៗ ៥ ចំណុច

នៅព្រឹកថ្ងៃសុក្រ ទី២៨ ខែវិច្ឆិកា ឆ្នាំ២០២៥ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញដឹកនាំ កិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សា និងសម្រេចលើរបៀបវារៈសំខាន់ៗចំនួន ៥ ចំណុច។

របៀបវារៈចម្បងទាំង ៥ រួមមាន៖

1. កិច្ចព្រមព្រៀងដឹកជញ្ជូនផ្លូវអាកាស ASEAN-EU: សេចក្តីព្រាងច្បាប់ស្តីពីការអនុម័តយល់ព្រមលើ កិច្ចព្រមព្រៀងគ្រប់ជ្រុងជ្រោយស្តីពីការដឹកជញ្ជូនតាមផ្លូវអាកាស រវាងរដ្ឋសមាជិកអាស៊ាន និងសហភាពអឺរ៉ុប (EU)។ (សូមមើលព័ត៌មានលម្អិត៖ វិភាគ៖ ឱកាសទេសចរណ៍ និងពាណិជ្ជកម្មពីផ្លូវអាកាស ASEAN-EU)
2. ការពង្រីកសិទ្ធិហោះហើរ ASEAN-ចិន: សេចក្តីព្រាងច្បាប់ស្តីពីការអនុម័តយល់ព្រមលើ ពិធីសារទី៣ ស្តីពីការពង្រីកសិទ្ធិហោះហើរទី៥ ក្រោមកិច្ចព្រមព្រៀងដឹកជញ្ជូនតាមផ្លូវអាកាសអាស៊ាន-ចិន។
3. សេវាកម្មដឹកជញ្ជូនផ្លូវអាកាសអាស៊ាន: សេចក្តីព្រាងច្បាប់ស្តីពីការអនុម័តយល់ព្រមលើ ពិធីសារអនុវត្តកញ្ចប់កិច្ចសន្យាទី១១ និងទី១២ នៃសេវាកម្មដឹកជញ្ជូនតាមផ្លូវអាកាសក្រោមកិច្ចព្រមព្រៀងក្របខ័ណ្ឌអាស៊ាន។
4. គោលនយោបាយអភិវឌ្ឍន៍ជនបទ: សេចក្តីព្រាង គោលនយោបាយជាតិស្តីពីការអភិវឌ្ឍជនបទ ឆ្នាំ២០២៥-២០៣៥។
5. របាយការណ៍ជំងឺអេដស៍: សេចក្តីព្រាង របាយការណ៍វឌ្ឍនភាពស្តីពីការឆ្លើយតបនឹងមេរោគអេដស៍ និងជំងឺអេដស៍ឆ្នាំ២០២៤។

ក្រៅពីរបៀបវារៈខាងលើនេះ កិច្ចប្រជុំក៏នឹងជជែកពិភាក្សាលើបញ្ហាផ្សេងៗពាក់ព័ន្ធនឹងកិច្ចការដឹកនាំរដ្ឋផ្សេងទៀតផងដែរ។

កិច្ចប្រជុំពេញអង្គគណៈរដ្ឋមន្ត្រី នេះ គឺជាកិច្ចប្រជុំដ៏សំខាន់រវាងថ្នាក់ដឹកនាំរាជរដ្ឋាភិបាលក្រោមអធិបតីភាពរបស់នាយករដ្ឋមន្ត្រី។

• អ្នកចូលរួម: សមាជិករាជរដ្ឋាភិបាលជាឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រី។
• គោលបំណង: ពិនិត្យ និងសម្រេចទៅលើសេចក្តីព្រាងច្បាប់ ព្រាងគោលនយោបាយនានា និងកិច្ចការទាំងឡាយរបស់រាជរដ្ឋាភិបាល។
• បច្ចេកវិទ្យា: កិច្ចប្រជុំនេះក៏នឹងធ្វើឡើងតាមប្រព័ន្ធវីដេអូផងដែរ ដើម្បីនាយករដ្ឋមន្ត្រីបានដាក់ចេញនូវផែនការនានាទៅកាន់មន្ត្រីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ៕