ខេត្តព្រៃវែង៖ បច្ចុប្បន្ននេះ តំបន់ «ឈើកាច់បាភ្នំ» ដែលស្ថិតនៅក្នុងស្រុកបាភ្នំ ខេត្តព្រៃវែង បានប្រែក្លាយជាគោលដៅទេសចរណ៍ដ៏មានសក្តានុពល និងទាក់ទាញភ្ញៀវជាតិ និងអន្តរជាតិឱ្យមកទស្សនាកម្សាន្តកាន់តែច្រើនកុះករ។ ការផ្លាស់ប្ដូរនេះកើតចេញពីការបង្កើនការយកចិត្តទុកដាក់របស់រដ្ឋបាលស្រុក ខេត្ត មន្ទីរជំនាញ និងអាជ្ញាធរ ក្នុងការកែលម្អ និងអភិវឌ្ឍន៍ហេដ្ឋារចនាសម្ព័ន្ធសម្រាប់តំបន់រមណីយដ្ឋានប្រវត្តិសាស្ត្រ និងធម្មជាតិមួយនេះ។
ជាមួយគ្នានេះ តាមរយៈកិច្ចសហការល្អរវាងអាជ្ញាធរមូលដ្ឋាន រដ្ឋបាលខេត្ត និងមន្ទីរទេសចរណ៍ខេត្ត ការរៀបចំសោភ័ណភាព បរិស្ថាន អនាម័យ និងសេវាកម្មនៅក្នុងតំបន់រមណីយដ្ឋាន ត្រូវបានលើកកម្ពស់ឱ្យកាន់តែប្រសើរ និងមានលក្ខណៈស្តង់ដារ។ តំបន់ «ឈើកាច់បាភ្នំ» ទាំងមូលត្រូវបានថែរក្សា និងការពារឱ្យស្ថិតស្ថេរគង់វង្ស ដើម្បីបម្រើឱ្យសកម្មភាពអភិវឌ្ឍន៍លើវិស័យនានា ជាពិសេសវិស័យទេសចរណ៍។
ការអភិវឌ្ឍន៍នេះ មិនត្រឹមតែជួយលើកកម្ពស់មុខមាត់តំបន់បាភ្នំ ដែលជាទីតាំងសក្ការៈ និងប្រវត្តិសាស្ត្រប៉ុណ្ណោះទេ ថែមទាំងជួយជំរុញសេដ្ឋកិច្ចដល់ប្រជាពលរដ្ឋក្នុងមូលដ្ឋាន តាមរយៈវិស័យទេសចរណ៍នេះផងដែរ។ បាភ្នំ គឺជាតំបន់ដែលមានសក្តានុពលខ្លាំងខាងទេសចរណ៍វប្បធម៌ និងជំនឿ ជាពិសេសពិធី ឡើងអ្នកតាមេ ស ដ៏ល្បីល្បាញ៕
