ខេត្តពោធិ៍សាត់៖ ជំនន់ទឹកភ្លៀងដែលកើតឡើងនៅខេត្តពោធិ៍សាត់ បានបន្តបង្កការប៉ះពាល់ដល់ការរស់នៅរបស់ពលរដ្ឋប្រមាណ ៣,៥០០ គ្រួសារ ខណៈពលរដ្ឋចំនួន ៥៤៥ គ្រួសារ ផ្សេងទៀត ត្រូវបានជម្លៀសចេញទៅកាន់ទីទួលសុវត្ថិភាព។ នេះបើតាមការបញ្ជាក់របស់លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) កាលពីថ្ងៃទី២២ ខែវិច្ឆិកា ឆ្នាំ២០២៥ ដោយបន្ថែមថា ស្ថានភាពជំនន់មិនទាន់ធូរស្រាលនៅឡើយទេ។
គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា ជំនន់នេះកើតចេញពីបរិមាណភ្លៀងធ្លាក់ដ៏ច្រើននៅផ្នែកខាងលើនៃខេត្តពោធិ៍សាត់ ចាប់តាំងពីថ្ងៃទី១៨ ខែវិច្ឆិកាមក។ គិតត្រឹមល្ងាចថ្ងៃទី២២ ខែវិច្ឆិកា ជំនន់ទឹកភ្លៀងនេះបានបង្កការលិចលង់ចំនួន ៥ ក្រុង-ស្រុក ឬស្មើនឹង ២២ ឃុំ ហើយបានប៉ះពាល់ដល់ផ្ទៃដីស្រូវចំនួន ៣,៣៣៨ ហិកតា។
លោក សុទ្ធ គឹមកុលមុនី បានគូសបញ្ជាក់ថា៖ «ដោយសារមានភ្លៀងធ្លាក់ច្រើននៅផ្នែកខាងលើនៃខេត្តពោធិ៍សាត់ ចាប់តាំងពីថ្ងៃទី១៨ ខែវិច្ឆិកាមក បានធ្វើឱ្យកើតជាជំនន់ទឹកភ្លៀង ប៉ះពាល់ដល់ ៥ ក្រុង-ស្រុក ឬស្មើនឹង ២២ ឃុំ។ ត្រឹមល្ងាចថ្ងៃទី២២ ខែវិច្ឆិកា ទឹកមិនទាន់ស្រកអស់នៅឡើយទេ ហើយការស្រកនោះ គឺមានស្ថានភាពយឺតៗ»។
ទាក់ទងនឹងផលប៉ះពាល់ហេដ្ឋារចនាសម្ព័ន្ធ កាលពីថ្ងៃទី២០ ខែវិច្ឆិកា រដ្ឋបាលក្រុងពោធិ៍សាត់បានបង្ខំចិត្ត ផ្អាកចរាចរណ៍រថយន្តធុនធំគ្រប់ផ្លូវក្នុងក្រុង បន្ទាប់ពីផ្លូវមួយចំនួនរងការហូរច្រោះ និងបាក់ស្រុត ដោយសារជំនន់ទឹកភ្លៀង។ ការហាមប្រាមនេះ ធ្វើឡើងក្នុងគោលបំណងទប់ស្កាត់ការខូចខាតផ្លូវបន្ថែម និងធានាសុវត្ថិភាពដល់អ្នកបើកបរ។
ដោយឡែក រដ្ឋបាលខេត្តពោធិ៍សាត់ ដឹកនាំដោយលោក ខូយ រីដា អភិបាលខេត្ត ក៏បានខ្នះខ្នែងជម្លៀសពលរដ្ឋមួយចំនួនទៅកាន់ទីទួលសុវត្ថិភាព និងបានផ្ដល់ស្បៀងគាំទ្រដល់ពលរដ្ឋដែលរងផលប៉ះពាល់ផងដែរ។ ទន្ទឹមនេះ អភិបាលខេត្ត និងអាជ្ញាធរពាក់ព័ន្ធ ក៏បន្តចុះតាមដានស្ថានភាពជំនន់ទឹកភ្លៀងយ៉ាងជាប់លាប់ ដើម្បីត្រៀមអន្តរាគមន៍ និងបញ្ចៀសគ្រោះថ្នាក់ផ្សេងៗដែលអាចកើតមានឡើងដោយយថាហេតុ៕