គ្រូពេទ្យភ្នែកគៀនឃ្លាំងព្រមាន៖ ជាង ៧០% នៃពលរដ្ឋកម្ពុជាប្រើវ៉ែនតាខុសស្តង់ដារបច្ចេកទេស!

នារសៀលថ្ងៃទី២៩ ខែវិច្ឆិកា ឆ្នាំ២០២៥ ចក្ខុបណ្ឌិត ប៉ាង សាម៉ន ប្រធានគ្រូពេទ្យភ្នែកគៀនឃ្លាំង បានលើកឡើងពីបញ្ហាគួរឲ្យព្រួយបារម្ភមួយជុំវិញសុខភាពភ្នែករបស់ពលរដ្ឋកម្ពុជា។ ការថ្លែងនេះធ្វើឡើងនៅក្នុងកម្មវិធីពិនិត្យភ្នែក និងវាស់កាត់វ៉ែនតាដោយឥតគិតថ្លៃជូនដល់ថ្នាក់ដឹកនាំ និងមន្ត្រីនៃក្រសួងព័ត៌មាន ដែលប្រព្រឹត្តទៅក្រោមអធិបតីភាពឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។

ចក្ខុបណ្ឌិត ប៉ាង សាម៉ន បានថ្លែងថា បច្ចុប្បន្ន ពលរដ្ឋកម្ពុជាប្រមាណជាង ៧០% ប្រើប្រាស់វ៉ែនតាពុំបានត្រឹមត្រូវតាម ស្តង់ដារបច្ចេកទេសពេទ្យភ្នែក ឡើយ។ ភាគច្រើនគ្រាន់តែ «ល» (សាកល្បង) ឃើញអាចប្រើបានក៏ចេះតែប្រើទៅ ដោយ ពុំបានវាស់ភ្នែកឲ្យបានត្រឹមត្រូវ តាមលក្ខណៈបច្ចេកទេសឡើយ។

ដើម្បីចៀសវាងផលប៉ះពាល់រយៈពេលវែង លោក ប៉ាង សាម៉ន បានអំពាវនាវយ៉ាងទទូចដល់ពលរដ្ឋទូទៅសូមឲ្យមានការ ពិនិត្យភ្នែកឲ្យបានត្រឹមត្រូវ ជាពិសេសត្រូវទៅ ជួបជាមួយគ្រូពេទ្យជំនាញ ដើម្បីពិនិត្យ និងព្យាបាលភ្នែកដែលមានបញ្ហាឲ្យបានទាន់ពេលវេលា និងត្រឹមត្រូវ។

លោកចក្ខុបណ្ឌិតបានបង្ហាញក្តីរីករាយដែលបានដឹកនាំក្រុមគ្រូពេទ្យឯកទេសភ្នែកចុះមកពិនិត្យភ្នែក និងវាស់កាត់វ៉ែនតាដោយឥតគិតថ្លៃជូនដល់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ និងមន្ត្រីជាប់កិច្ចសន្យា នៃក្រសួងព័ត៌មាននាពេលនេះ។

ក្រុមការងាររបស់លោកបានចាប់ផ្តើមធ្វើកិច្ចការមនុស្សធម៌នេះតាំងពី ឆ្នាំ២០១១ ហើយនេះគឺជា លើកទី ៩៤ ហើយ ដោយសរុបមានមន្ត្រីរាជការ និងគ្រូបង្រៀនប្រមាណជាង ៣៥ ០០០ នាក់ បានទទួលនូវការផ្តល់ជូនវ៉ែនតាពីក្រុមគ្រូពេទ្យរបស់លោក។

លោកបានបញ្ជាក់ថា កម្មវិធីនេះធ្វើឡើងក្នុងគោលបំណងចង់ឲ្យមន្ត្រីរាជការ និងលោកគ្រូ អ្នកគ្រូ ទទួលបាននូវ ការវាស់ភ្នែកបានត្រឹមត្រូវ មុននឹងត្រូវពាក់វ៉ែនតាត្រឹមកម្រិតណាមួយនោះ។

ចក្ខុបណ្ឌិត ប៉ាង សាម៉ន បានអំពាវនាវបន្ថែមដល់ពលរដ្ឋទូទៅឲ្យយកចិត្តទុកដាក់ខ្ពស់ទៅលើ បញ្ហាសុខភាពភ្នែក ដោយត្រូវទៅពិនិត្យ និងព្យាបាលភ្នែកដែលមានបញ្ហាឲ្យបានទាន់ពេលវេលា។

លោកបានណែនាំថា បងប្អូនអាចអញ្ជើញទៅមន្ទីរពេទ្យមួយចំនួនដែលមានផ្នែកពិនិត្យ និងព្យាបាលភ្នែក ដូចជា មន្ទីរពេទ្យព្រះកុសុមៈ ជាដើម។ អ្វីដែលសំខាន់គឺអ្នកដែលមាន បណ្ណ ប.ស.ស. ឬបណ្ណក្រីក្រ នឹង មិនអស់លុយ សម្រាប់ការពិនិត្យ និងព្យាបាលឡើយ៕

❓ សំណួរដែលសួរញឹកញាប់អំពីការប្រើប្រាស់វ៉ែនតា និងសុខភាពភ្នែក

១. តើអ្វីជាបញ្ហាធំបំផុតទាក់ទងនឹងការប្រើប្រាស់វ៉ែនតានៅកម្ពុជាបច្ចុប្បន្ន?

ចម្លើយ: បញ្ហាធំបំផុតគឺ ពលរដ្ឋជាង ៧០% ប្រើប្រាស់វ៉ែនតា ពុំបានត្រឹមត្រូវតាមស្តង់ដារបច្ចេកទេសពេទ្យភ្នែក ឡើយ។ ពួកគេគ្រាន់តែសាកល្បងឃើញអាចប្រើបានក៏ប្រើទៅ ដោយមិនបានវាស់ភ្នែកឲ្យបានត្រឹមត្រូវជាមួយគ្រូពេទ្យជំនាញឡើយ។

២. តើការប្រើប្រាស់វ៉ែនតាខុសស្តង់ដារអាចប៉ះពាល់ដល់សុខភាពភ្នែកយ៉ាងដូចម្តេច?

ចម្លើយ: ការប្រើវ៉ែនតាដែលមិនត្រឹមត្រូវតាមកម្រិតភ្នែកជាក់ស្តែង អាចបណ្តាលឲ្យភ្នែកត្រូវប្រឹងខ្លាំង (Eye Strain) ជាងមុន, ឈឺក្បាល, វិលមុខ, និងអាចធ្វើឲ្យ បញ្ហាចក្ខុវិញ្ញាណកាន់តែយ៉ាប់យឺន ទៅៗ ក្នុងរយៈពេលវែង។

៣. តើពលរដ្ឋគួរធ្វើអ្វីខ្លះដើម្បីធានាថាវ៉ែនតាដែលខ្លួនប្រើត្រឹមត្រូវ?

ចម្លើយ: ត្រូវតែ ទៅជួបជាមួយគ្រូពេទ្យជំនាញ ដើម្បីពិនិត្យភ្នែក ធ្វើតេស្តឲ្យបានត្រឹមត្រូវ និងវាស់កាត់វ៉ែនតាឲ្យត្រូវតាមលក្ខណៈបច្ចេកទេសពេទ្យភ្នែកមុននឹងពាក់វ៉ែនតា។

៤. តើពលរដ្ឋដែលមានបណ្ណ ប.ស.ស. ឬបណ្ណក្រីក្រអាចទៅពិនិត្យភ្នែកដោយឥតគិតថ្លៃនៅឯណាខ្លះ?

ចម្លើយ: អ្នកដែលមានបណ្ណ ប.ស.ស. ឬបណ្ណក្រីក្រអាចអញ្ជើញទៅមន្ទីរពេទ្យមួយចំនួនដែលមានផ្នែកពិនិត្យ និងព្យាបាលភ្នែក ដូចជា មន្ទីរពេទ្យព្រះកុសុមៈ ជាដើម ដែលការពិនិត្យ និងព្យាបាលនឹង មិនអស់លុយ ឡើយ។

៥. តើក្រុមគ្រូពេទ្យភ្នែកគៀនឃ្លាំងបានផ្តល់សេវាពិនិត្យភ្នែកមនុស្សធម៌ប៉ុន្មាននាក់ហើយ?

ចម្លើយ: ក្រុមគ្រូពេទ្យបានចាប់ផ្តើមធ្វើកិច្ចការនេះតាំងពីឆ្នាំ២០១១ ហើយមកទល់ពេលនេះ (ការលើកឡើងនេះ) គឺលើកទី ៩៤ ហើយ ដោយបានផ្តល់ជូនវ៉ែនតាដល់មន្ត្រីរាជការ និងគ្រូបង្រៀនសរុបប្រមាណជាង ៣៥ ០០០ នាក់។