សម្ដេច ហ៊ុន ម៉ាណែត និងឧបនាយករដ្ឋមន្ត្រីវៀតណាម ជួបពិភាក្សា៖ ជំរុញទំនាក់ទំនងទ្វេភាគី និងប្រែក្លាយព្រំដែនជាតំបន់វិបុលភាព

នារសៀលថ្ងៃទី២៨ ខែវិច្ឆិកា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យឯកឧត្តម Bui Thanh Son ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម ចូលជួបសម្ដែងការគួរសម និងពិភាក្សាការងារដ៏សំខាន់នៅវិមានសន្តិភាព។

ក្នុងជំនួបនោះ ឯកឧត្តមឧបនាយករដ្ឋមន្ត្រីវៀតណាម បានថ្លែងអំណរគុណយ៉ាងជ្រាលជ្រៅចំពោះសម្តេចបវរធិបតីដែលបានអនុញ្ញាតឱ្យគណៈប្រតិភូចូលជួបពិភាក្សា។ ឯកឧត្តម Bui Thanh Son បានកោតសរសើរ និងវាយតម្លៃខ្ពស់ចំពោះ សមិទ្ធផលជាច្រើន ដែលកម្ពុជាសម្រេចបាននាពេលកន្លងមក។ លោកបានសម្តែងជំនឿយ៉ាងមុតមាំថា ក្រោមការដឹកនាំប្រកបដោយភាពឈ្លាសវៃ និង ចក្ខុវិស័យវែងឆ្ងាយ របស់សម្តេចនាយករដ្ឋមន្ត្រី កម្ពុជានឹងបន្តរីកចម្រើនបន្ថែមទៀត។

ឯកឧត្តមឧបនាយករដ្ឋមន្ត្រីក៏បានសម្ដែងនូវការពេញចិត្តចំពោះវឌ្ឍនភាពនៃ ទំនាក់ទំនង និងកិច្ចសហប្រតិបត្តិការទ្វេភាគីដ៏ល្អប្រសើរ លើគ្រប់វិស័យ។ ឯកឧត្តមបានកត់សម្គាល់ថា ការផ្លាស់ប្ដូរដំណើរទស្សនកិច្ចគ្រប់កម្រិតរបស់គណៈប្រតិភូប្រទេសទាំងពីរ បានរួមចំណែកយ៉ាងសកម្មដល់ ការពង្រឹង និងពង្រីកទំនាក់ទំនង កម្ពុជា-វៀតណាម ឲ្យកាន់តែរឹងមាំ។

ជាការឆ្លើយតប សម្តេចបវរធិបតីបានសម្ដែងសេចក្ដីសោមនស្សរីករាយ និងស្វាគមន៍គណៈប្រតិភូវៀតណាមមកបំពេញទស្សនកិច្ចនៅកម្ពុជា។ សម្តេចនាយករដ្ឋមន្ត្រីបានឆ្លៀតឱកាសសម្តែងការចូលរួម មរណទុក្ខ ជាមួយរដ្ឋាភិបាល និងប្រជាជនវៀតណាម ចំពោះការបាត់បង់ជីវិត និងការខូចខាតទ្រព្យសម្បត្តិដោយសារ គ្រោះទឹកជំនន់ នាពេលថ្មីៗនេះ។

សម្តេចក៏បានគូសបញ្ជាក់ពីការពេញចិត្តចំពោះវឌ្ឍនភាពដ៏ល្អនៃ ទំនាក់ទំនងទ្វេភាគី លើគ្រប់វិស័យ ហើយបានលើកទឹកចិត្តដល់ក្រសួង-ស្ថាប័នពាក់ព័ន្ធ និងជាពិសេស រដ្ឋបាលថ្នាក់ក្រោមជាតិ នៃបណ្តាខេត្តជាប់ព្រំដែនទាំងពីរឲ្យបន្តជំរុញកិច្ចសហប្រតិបត្តិការជាមួយគ្នា។ គោលបំណងចម្បងគឺ ប្រែក្លាយតំបន់ព្រំដែន ជាព្រំដែនសន្តិភាព មិត្តភាព និងវិបុលភាព។

សម្តេចបវរធិបតី និងឯកឧត្តមឧបនាយករដ្ឋមន្ត្រីវៀតណាម បានពិភាក្សាគ្នាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីកម្ពុជា-វៀតណាម ឲ្យកាន់តែរឹងមាំលើវិស័យសំខាន់ៗជាអាទិ៍៖

• សេដ្ឋកិច្ច និងពាណិជ្ជកម្ម
• ការពារជាតិ និងសន្តិសុខ
• អប់រំ សុខាភិបាល វប្បធម៌ និងទេសចរណ៍
• ការតភ្ជាប់ហេដ្ឋារចនាសម្ព័ន្ធ នៃប្រទេសទាំងពីរ

ការពិភាក្សានេះគឺដើម្បីឧត្តមប្រយោជន៍របស់ប្រជាជននៃប្រទេសទាំងពីរ៕