ក្រសួងអប់រំ យុវជន និងកីឡា (MoEYS) នៅថ្ងៃទី២៨ ខែវិច្ឆិកា ឆ្នាំ២០២៥ នេះ បានចេញ សេចក្តីណែនាំ ជាថ្មីម្តងទៀតដើម្បីពង្រឹងការហាមឃាត់នូវសកម្មភាពចំនួន ៤ ដែលពាក់ព័ន្ធនឹងផលិតផលភេសជ្ជៈប៉ូវកម្លាំងគ្រប់ប្រភេទ៖
- ការទទួលទាន
- ការចែកចាយ
- ការតាំងលក់
- ការផ្សព្វផ្សាយពាណិជ្ជកម្ម
សកម្មភាពទាំងនេះត្រូវហាមឃាត់ដាច់ខាតនៅក្នុង បរិវេណគ្រឹះស្ថានសិក្សាសាធារណៈ និងឯកជន ទាំងអស់។
សេចក្តីណែនាំថ្មីនេះមានគោលបំណងសំខាន់ៗដូចខាងក្រោម៖
- យកចិត្តទុកដាក់បន្ថែមលើសុខភាពសិស្ស: ធានាបាននូវបរិស្ថានសិក្សាប្រកបដោយសុវត្ថិភាពផ្នែកសុខភាព។
- បង្ការហានិភ័យនៃជំងឺមិនឆ្លង: ជាពិសេសគឺជំងឺ ទឹកនោមផ្អែម ដែលកំពុងមាននិន្នាការកើនឡើងក្នុងចំណោមសិស្សានុសិស្ស។
- កែប្រែទម្លាប់ទទួលទាន: ការកើនឡើងនៃជំងឺទឹកនោមផ្អែមគឺមានទំនាក់ទំនងផ្ទាល់ទៅនឹងទម្លាប់ទទួលទាន ចំណីអាហារ ភេសជ្ជៈផ្អែម និង ភេសជ្ជៈប៉ូវកម្លាំង។
ការហាមឃាត់នេះមានវិសាលភាពអនុវត្តចំពោះគ្រឹះស្ថានសិក្សាចំណេះដឹងទូទៅទាំង សាធារណៈ និង ឯកជន ទូទាំងប្រទេស ដើម្បីការពារសិស្សានុសិស្សគ្រប់កម្រិតពីផលប៉ះពាល់អវិជ្ជមាននៃភេសជ្ជៈទាំងនេះ។
គួរបញ្ជាក់ផងដែរថា ក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំ ២០២៤-២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានស្នើឱ្យក្រសួងសុខាភិបាល ក៏ដូចជាក្រសួងអប់រំ គិតគូឡើងវិញពីបញ្ហាភេសជ្ជៈប៉ូវកម្លាំង ដែលប៉ះពាល់ដល់សុខភាពកុមារកម្ពុជា។
“រឿងប្រើប្រាស់អាទឹកប៉ូវកម្លាំង… សុំឱ្យឪពុកម្តាយ ប្រជាជន លោកគ្រូអ្នកគ្រូទាំងអស់ និងអ្នកលក់គិតគូពីរឿងនេះ… ទៅមើលមន្ទីរពេទ្យគន្ធបុប្ឆា ក្មេងៗច្រើនណាស់ ហើយនេះ ពេលខ្លះពាក់ព័ន្ធទៅនឹងការយល់ដឹងរបស់ឪពុកម្តាយ…”
សម្តេចធិបតីមានប្រសាសន៍ថា ភេសជ្ជៈប៉ូវកម្លាំង មិនមែនសម្រាប់ក្មេងៗនោះទេ ដោយសម្តេចបានសង្កត់ធ្ងន់ថា ក្មេងៗដែលប្រើប្រាស់ភេសជ្ជៈប៉ូវកម្លាំង ឬភេសជ្ជៈដែលមានជាតិផ្អែមខ្លាំង ចាប់ពីពេលនេះ រហូតដល់ពួកគេមានអាយុ៣០ ឬ៤០ឆ្នាំ ពួកគេនឹងក្លាយជាបន្ទុកសង្គម ដោយអាចនឹងកើតមានជំងឺទឹកនោមផ្អែម ឬជំងឺផ្សេងៗ។ សម្តេចនាយករដ្ឋមន្រ្តីមានប្រសាសន៍ថា រឿងនេះ គឺជារឿងមួយដែលត្រូវប្រកាសអាសន្ន៕
ខាងក្រោមនេះគឺជាសេចក្ដីណែនាំរបស់ក្រសួងអប់រំ៖
