នៅថ្ងៃទី២៦ ខែវិច្ឆិកា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានជួបពិភាក្សាជាមួយលោកស្រី YASMIN SIDDIQI នាយកថ្មីរបស់ធនាគារអភិវឌ្ឍន៍អាស៊ី (ADB) ប្រចាំកម្ពុជា។
ក្នុងជំនួបនេះ ឯកឧត្តមរដ្ឋមន្ត្រីបានសង្កត់ធ្ងន់ថា ក្រសួងបរិស្ថានបន្តជំរុញសកម្មភាពតាម ផែនការយុទ្ធសាស្ត្ររបស់រាជរដ្ឋាភិបាល ដើម្បីឆ្ពោះទៅរក ភាពស្អាត និង បង្កើនគម្របបៃតង នៅកម្ពុជា។ ឯកឧត្តមក៏បានថ្លែងអំណរគុណដល់ ADB ចំពោះកិច្ចសហប្រតិបត្តិការដ៏ល្អក្នុងវិស័យបរិស្ថាន។
ក្រសួងបានបន្តពង្រឹងការងារគ្រប់គ្រងបរិស្ថាន និងទប់ស្កាត់ការបំពុល បន្ទាប់ពីទទួលបានជោគជ័យក្នុងការអនុវត្តសកម្មភាពប្តេជ្ញាចិត្ត «ដើម្បីភាពស្អាតនៅកម្ពុជា» ដែលមានអ្នកចូលរួម ជាង ១៤ លាននាក់។
- ការចែកចាយធុងសំរាម: ក្រសួងបន្តចែក ធុងសំរាមដោយឥតគិតថ្លៃ ជូនទៅដល់មូលដ្ឋាន វត្តអារាម សាលារៀន និងមូលដ្ឋានសុខាភិបាល។
- គោលដៅចម្បង: ជំរុញឲ្យប្រជាពលរដ្ឋ ចេះទុកដាក់ និងញែកសំរាមបានត្រឹមត្រូវ កាត់បន្ថយការប្រើប្រាស់ប្លាស្ទិក រៀបចំភូមិឋានឲ្យបានស្អាត និងថែមទាំងអាច ទាញយកប្រយោជន៍សេដ្ឋកិច្ច ចេញពីការទុកដាក់សំរាមត្រឹមត្រូវទៀតផង។
- ការគ្រប់គ្រងទីលាន: ក្រសួងនឹងលើកកម្ពស់ការទុកដាក់សំរាមសំណល់រឹងចុងក្រោយ តាមរយៈការ កែសម្រួលទីលានដែលមានស្រាប់ និងជំរុញការរៀបចំ ទីលានថ្មីស្របតាមស្តង់ដារបច្ចេកទេស។
អានបន្ថែម៖ កម្ពុជាទទួលបានកម្ចី ៥០ លានដុល្លារពី ADB ដើម្បីពង្រឹងហេដ្ឋារចនាសម្ព័ន្ធហិរញ្ញវត្ថុឌីជីថល
ដើម្បីជំរុញកំណើនគម្របភាពបៃតងនៅកម្ពុជា ក្រសួងបរិស្ថានបានដាក់ចេញនូវគម្រោងជាច្រើន៖
- មជ្ឈមណ្ឌល និងថ្នាលបណ្តុះកូនឈើ: ក្រសួងបានបង្កើត មជ្ឈមណ្ឌលចីរភាពបរិស្ថាន និងថ្នាលបណ្តុះកូនឈើថ្នាក់តំបន់ចំនួន ៥ កន្លែង (នៅត្បូងឃ្មុំ មណ្ឌលគិរី សៀមរាប កំពង់ស្ពឺ និងកោះកុង) ដែលមានសមត្ថភាពផលិតកូនឈើបានច្រើនលានដើមក្នុងមួយឆ្នាំ។
- ការចែកចាយឥតគិតថ្លៃ: ក្នុងឆ្នាំ២០២៥ ក្រសួងបានចែក កូនឈើ និងកូនត្នោតចំនួន ៣,៤ លានដើម ដោយឥតគិតថ្លៃជូនប្រជាពលរដ្ឋយកទៅដាំពង្រីកគម្របបៃតង។
- ផែនការឆ្នាំ២០២៦: ក្រសួងមានគម្រោងចែកកូនឈើជូនប្រជាពលរដ្ឋយកទៅដាំចំនួន ៥ លានដើម នៅឆ្នាំ២០២៦ ខាងមុខ។
ក្រសួងបរិស្ថានបន្តចូលរួមជំរុញសកម្មភាពលើគម្រោងបង្កើនភាពបៃតង ស្របតាមយុទ្ធសាស្ត្រដឹកនាំរបស់សម្តេចធិបតី ហ៊ុន ម៉ាណែត ដោយផ្តោតលើ៖
- ការអភិវឌ្ឍន៍ជីវភាព: លើកកម្ពស់ជីវភាពប្រជាពលរដ្ឋនៅតាម សហគមន៍តំបន់ការពារធម្មជាតិ។
- ការគ្រប់គ្រងធនធាន: ពង្រឹងការគ្រប់គ្រងធនធានធម្មជាតិ និងអភិរក្សជីវៈចម្រុះ។
- គម្រោងគាំទ្រជាក់ស្តែង: បច្ចុប្បន្ន សហគមន៍មួយចំនួន (ដូចជានៅភ្នំខ្នងផ្សារ និងទេទឹកពុះ ខេត្តកំពង់ស្ពឺ) កំពុងទទួលបានជំនួយក្នុងការ រៀបចំហេដ្ឋារចនាសម្ព័ន្ធ និងអភិវឌ្ឍន៍គោលដៅលំហែបៃតង ដើម្បី បង្កើនចំណូល ព្រមទាំងមាន គម្រោងប្រែក្លាយសហគមន៍អព្យាក្រឹតកាបូន ផងដែរ។
លោកស្រី YASMIN SIDDIQI នាយកថ្មី ADB បានសម្តែងការចាប់អារម្មណ៍និង វាយតម្លៃខ្ពស់ ចំពោះការជំរុញសកម្មភាពដើម្បីភាពស្អាត ការពង្រឹងការគ្រប់គ្រងធនធានធម្មជាតិ និងការជួយឲ្យជីវភាពប្រជាជនមានភាពល្អប្រសើរឡើង។ លោកស្រីក៏បានលើកឡើងពីការពង្រឹង និងពង្រីកកិច្ចសហប្រតិបត្តិការលើការគ្រប់គ្រងបរិស្ថានផងដែរ៕