ភ្នំពេញ៖ លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី (គណៈកម្មការទី៨) នៃរដ្ឋសភា បានដឹកនាំគណៈប្រតិភូចុះពិនិត្យ និងឈ្វេងយល់ពីវឌ្ឍនភាពការងារ បញ្ហាប្រឈម ចក្ខុវិស័យ និងការផ្តល់សេវាសុខាភិបាលនៅមន្ទីរពេទ្យមិត្តភាពកម្ពុជា-ចិន ព្រះកុសមៈ នារសៀលថ្ងៃទី២១ ខែវិច្ឆិកា ឆ្នាំ២០២៥។
ក្នុងដំណើរទស្សនកិច្ចនេះ លោកជំទាវបានកោតសរសើរចំពោះភាពរីកចម្រើនរបស់មន្ទីរពេទ្យ ដែលបានវិវត្តន៍ខ្លួនក្លាយជាមន្ទីរពេទ្យឯកទេសមួយ និងទទួលបានការសាទរពីសំណាក់ប្រជាពលរដ្ឋគ្រប់មជ្ឈដ្ឋាន។ វត្តមានរបស់គណៈកម្មការទី៨ ក្នុងគោលបំណងចម្បងដើម្បីពិនិត្យលើកម្មវិធីនយោបាយអាទិភាពរបស់រាជរដ្ឋាភិបាលនីតិកាលទី៧ និងយុទ្ធសាស្ត្របញ្ចកោណដំណាក់កាលទី១ ចំពោះការផ្តល់ការថែទាំសុខភាពចម្បងឆ្ពោះទៅ កម្មវិធីគ្របដណ្តប់សុខភាពជាសកល និងការពង្រីកការគាំពារថែទាំសុខភាពរបស់របបបេឡាជាតិសន្តិសុខសង្គម (ប.ស.ស.) ដែលកម្មវិធីទាំងនេះកំពុងទទួលបានជោគជ័យគួរឱ្យកត់សម្គាល់។
ការចុះត្រួតពិនិត្យនេះទទួលបានការស្វាគមន៍ពីឯកឧត្តម ឡឹម តារា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាល តំណាងឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីសុខាភិបាល និងឯកឧត្តមសាស្រ្តាចារ្យជំនួយ តាន់ សុគុន នាយកមន្ទីរពេទ្យ។
លោកជំទាវ ឡោក ខេង បានសំណូមពរដល់ថ្នាក់ដឹកនាំ និងក្រុមគ្រូពេទ្យទាំងអស់ ឱ្យខិតខំធ្វើកិច្ចសហការជាមួយបណ្តាមន្ទីរពេទ្យថ្នាក់ខេត្ត ស្រុក និងមណ្ឌលសុខភាព ឱ្យមានប្រសិទ្ធភាពខ្ពស់ទាំងគុណភាព និងសេវា ដើម្បីឱ្យប្រជាពលរដ្ឋមានជំនឿទុកចិត្តលើវិស័យសុខាភិបាល និងអាចប្រកួតប្រជែងក្នុងថ្នាក់ជាតិ និងថ្នាក់តំបន់បានល្អប្រសើរ។
ជាការឆ្លើយតប ឯកឧត្តមសាស្រ្តាចារ្យជំនួយ តាន់ សុគុន បានធ្វើរបាយការណ៍ពីវឌ្ឍនភាពការងាររបស់មន្ទីរពេទ្យ ដោយគូសបញ្ជាក់ពីការទទួលបានជំនួយឧបត្ថម្ភគាំទ្រពីសាធារណរដ្ឋប្រជាមានិតចិន ក្នុងការកសាងអគារសម្រាកព្យាបាលជំងឺ និងវះកាត់ខ្នាតធំ ព្រមទាំងការបំពាក់ឧបករណ៍ទំនើបៗ។ ឯកឧត្តមនាយកមន្ទីរពេទ្យបានសង្កត់ធ្ងន់លើការបណ្ដុះស្មារតីឥរិយាបថ និងសីលធម៌គ្រូពេទ្យក្នុងការបម្រើសេវាប្រកបដោយរួសរាយរាក់ទាក់ និងបានប្តេជ្ញាបន្តផ្ដល់សេវាពិនិត្យព្យាបាលជូនប្រជាពលរដ្ឋដោយមិនរើសអើងជាដាច់ខាត ព្រមទាំងត្រៀមបម្រុងឆ្លើយតបការផ្ទុះឡើងនូវជំងឺឆ្លងគ្រប់ពេល។
ក្រោយពីស្តាប់របាយការណ៍ លោកជំទាវ ឡោក ខេង បានកោតសរសើរដល់នាយកមន្ទីរពេទ្យ និងក្រុមគ្រូពេទ្យទាំងអស់ ដែលបានលះបង់អស់ទាំងកម្លាំងកាយចិត្តក្នុងការផ្តល់សេវាព្យាបាលទាន់ពេលវេលា និងមានក្រមសីលធម៌វិជ្ជាជីវៈ ស័ក្តិសមទៅនឹងងារ “កងទ័ពទេវតា”។ នេះក៏ជាការរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលយកចិត្តទុកដាក់លើសុខុមាលភាពប្រជាពលរដ្ឋគ្រប់កាលៈទេសៈ។ លោកជំទាវក៏បានផ្តល់អនុសាសន៍បន្ថែមឱ្យមន្ទីរពេទ្យខិតខំផ្សព្វផ្សាយឱ្យបានទូលំទូលាយរាល់បញ្ហាជំងឺមិនឆ្លងដល់ប្រជាពលរដ្ឋផងដែរ៕
