ខេត្តស្វាយរៀង៖ កម្លាំងសមត្ថកិច្ចចម្រុះបានធ្វើប្រតិបត្តិការចុះត្រួតពិនិត្យឆែកឆេរនៅទីតាំងសង្ស័យចំនួន ២កន្លែង ស្ថិតនៅបុរី CK ផ្ទះលេខ M47 និងផ្ទះលេខ M29 ក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង ដែលសង្ស័យថាមានការលួចលាក់ប្រព្រឹត្តបទល្មើស ឆបោកតាមប្រព័ន្ធបច្ចេកវិទ្យា (Online Scam)។ ជាលទ្ធផល ជនសង្ស័យសរុប ២៨នាក់ ក្នុងនោះមានស្ត្រី ០៣នាក់ ត្រូវបានឃាត់ខ្លួន។
ប្រតិបត្តិការនេះត្រូវបានដឹកនាំកាលពីថ្ងៃទី២២ ខែវិច្ឆិកា ឆ្នាំ២០២៥ ក្រោមការសម្របសម្រួលពីលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ដោយមានការចូលរួមពីអគ្គស្នងការដ្ឋាននគរបាលជាតិ គណៈបញ្ជាការឯកភាពខេត្តស្វាយរៀង និងអាជ្ញាធរពាក់ព័ន្ធ។
សម្ភារៈវត្ថុតាងដែលត្រូវបានរឹបអូស
ក្នុងប្រតិបត្តិការនេះ សមត្ថកិច្ចបានរឹបអូសសម្ភារៈជាវត្ថុតាងសំខាន់ៗមួយចំនួន រួមមាន៖
- កុំព្យូទ័រលើតុ ៤៧គ្រឿង
- ទូរសព្ទដៃ ២៥គ្រឿង
- ដុំ Mobile Tri Band Repeater ០១គ្រឿង
- ដុំ WiFi ចំនួន ៤គ្រឿង
- រថយន្ត ១គ្រឿង ម៉ាក Lexus RX400h ពណ៌ស ផ្លាកលេខ ភ្នំពេញ 2BZ-4107
- ម៉ូតូ ៤គ្រឿង
- ឯកសណ្ឋានសមត្ថកិច្ច, លិខិតឆ្លងដែន ១២ក្បាល, អត្តសញ្ញាណបណ្ណ ២៤សន្លឹក, បណ្ណបើកបរ ៥សន្លឹក និងផ្លាកលេខម៉ូតូវៀតណាម ១សន្លឹក។
ក្រោយការបង្រ្កាប សមត្ថកិច្ចជំនាញបច្ចុប្បន្នកំពុងសហការជាមួយភាគីពាក់ព័ន្ធដើម្បីបន្តស្រាវជ្រាវបន្ថែម ឈានទៅចាត់វិធានការផ្លូវច្បាប់ចំពោះមេខ្លោងនៃការឆបោកនេះ ខណៈដែលជនសង្ស័យទាំង ២៨នាក់ ត្រូវបានប្រគល់ជូនស្នងការដ្ឋាននគរបាលខេត្តស្វាយរៀង និងសមត្ថកិច្ចពាក់ព័ន្ធ ដើម្បីអនុវត្តតាមនីតិវិធីច្បាប់។ ចំណែកឯទីតាំងខាងលើត្រូវបានបិទជាបណ្តោះអាសន្ន។
សូមបញ្ជាក់ថា ក្នុងក្របខ័ណ្ឌយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានេះ សមត្ថកិច្ចចម្រុះទូទាំងប្រទេសនឹងចាត់វិធានការតាមផ្លូវច្បាប់យ៉ាងតឹងរ៉ឹងបំផុតចំពោះមេខ្លោងទាំងឡាយដែលជាប់ពាក់ព័ន្ធនឹងអំពើឆបោកនេះ ដោយគ្មានការលើកលែងឡើយ៕