ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានសម្តែងការវាយតម្លៃខ្ពស់ចំពោះទំនាក់ទំនងទ្វេភាគី និងកិច្ចសហប្រតិបត្តិការដ៏ទូលំទូលាយរវាងកម្ពុជា និងវៀតណាម ព្រមទាំងបានអះអាងសារជាថ្មីនូវការប្តេជ្ញាចិត្តរបស់កម្ពុជា ក្នុងការបន្តពង្រឹងភាពជាដៃគូនេះបន្ថែមទៀត។
តាមរយៈលិខិតចុះថ្ងៃទី២០ ខែវិច្ឆិកា ឆ្នាំ២០២៥ ដែលឆ្លើយតបទៅនឹងសារលិខិតអបអរសាទររបស់ឯកឧត្តម Tran Thanh Man ប្រធានរដ្ឋសភានៃសាធារណរដ្ឋសង្គមនិយមវៀតណាម ក្នុងឱកាសខួបលើកទី៧២ នៃទិវាបុណ្យឯករាជ្យជាតិកម្ពុជា សម្តេចតេជោបានគូសបញ្ជាក់ថា៖ «ខ្ញុំមានសេចក្តីសោមនស្សរីករាយដែលកម្ពុជា និងវៀតណាម បានរីករាយជាមួយទំនាក់ទំនងដ៏ល្អប្រសើរ និងកិច្ចសហប្រតិបត្តិការគ្រប់ជ្រុងជ្រោយ គ្រប់កម្រិត ដែលជាលទ្ធផលនៃការប្ដេជ្ញាចិត្តឥតងាករេជាបន្តបន្ទាប់របស់ថ្នាក់ដឹកនាំប្រទេសទាំងពីរ ក្នុងការលើកកម្ពស់មិត្តភាព និងកិច្ចសហប្រតិបត្តិការឈ្នះ-ឈ្នះ។ ខ្ញុំមានជំនឿយ៉ាងមុតមាំថា តាមរយៈការខិតខំប្រឹងប្រែងរួមគ្នា ប្រទេសយើងទាំងពីរនឹងរីកចម្រើនរួមគ្នានៅគ្រប់វិស័យនៃកិច្ចសហប្រតិបត្តិការ»។
ក្នុងឱកាសនោះ សម្តេចតេជោ ហ៊ុន សែន ក៏បានឆ្លៀតឱកាសថ្លែងអះអាងជាថ្មីនូវការប្តេជ្ញាចិត្តយ៉ាងម៉ឺងម៉ាត់របស់សម្ដេច ក្នុងការធ្វើការយ៉ាងជិតស្និទ្ធជាមួយឯកឧត្តម Tran Thanh Man ដើម្បីបន្តលើកកម្ពស់កិច្ចសហប្រតិបត្តិការរវាងស្ថាប័ននីតិប្បញ្ញត្តិទាំងពីរ ទាំងក្នុងក្របខ័ណ្ឌទ្វេភាគី និងពហុភាគី តាមរយៈការរួមចំណែកដល់ការធ្វើឱ្យកាន់តែស៊ីជម្រៅនូវទំនាក់ទំនងដ៏ល្អប្រសើរដែលមានស្រាប់ ក្រោមស្មារតី “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង”៕