ខេត្តកណ្ដាល៖ បញ្ញាសិប្បនិម្មិត (AI) គឺជាផ្នែកមួយដ៏សំខាន់ក្នុងវិស័យអប់រំនាសម័យទំនើបនេះ ដែលតម្រូវឱ្យលោកគ្រូ អ្នកគ្រូចាំបាច់ត្រូវមានការអភិវឌ្ឍខ្លួន និងផ្តល់ចំណេះដឹងផ្នែក AI នេះទៅឱ្យសិស្សានុសិស្ស។ ចំណែកសិស្សទៀតសោត ត្រូវមានការសិក្សាស្រាវជ្រាវបន្ថែមដោយខ្លួនឯង ដើម្បីទាញយកអត្ថប្រយោជន៍ពី AI មកបម្រើដល់ការសិក្សារៀនសូត្ររបស់ពួកគេ។
នេះជាការលើកឡើងរបស់ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា (MoEYS) ក្នុងពិធីបើក សន្និបាតការបង្រៀន និងរៀនលើកទី១០ ស្តីពី បច្ចេកវិទ្យាអប់រំ និងបញ្ញាសិប្បនិម្មិត៖ បរិវត្តកម្មការអប់រំ។ សន្និបាតនេះត្រូវបានរៀបចំឡើងដោយមជ្ឈមណ្ឌលបណ្តុះបណ្តាល និងប្រឡង អិន ធី ស៊ី នៃស្ថាប័នអប់រំ អិន ធី ស៊ី គ្រុប នៅក្រុងតាខ្មៅ ខេត្តកណ្តាល នាព្រឹកថ្ងៃទី២២ ខែវិច្ឆិកា ឆ្នាំ២០២៥។
ឯកឧត្តមរដ្ឋលេខាធិការបានគូសបញ្ជាក់ថា នេះគឺជាសម័យកាលនៃបច្ចេកវិទ្យា ដែលពិភពលោកកំពុងបោះជំហានទៅមុខយ៉ាងលឿន និងតម្រូវឱ្យយើងម្នាក់ៗត្រូវតែប្រឹងប្រែងរត់តាម។ ក្នុងនោះ វិស័យអប់រំគឺជាផ្នែកដ៏សំខាន់បំផុតមួយក្នុងការអនុវត្តនូវបច្ចេកវិទ្យាដែលកំពុងមានការអភិវឌ្ឍឥតឈប់ឈរ។
ឯកឧត្តមបានសម្តែងការអបអរសាទរចំពោះស្ថាប័នអប់រំ អិន ធី ស៊ី គ្រុប ដែលបានរៀបចំសន្និបាតដ៏មានសារៈសំខាន់នេះ។ សន្និបាតនេះគឺស្របតាមគោលដៅរបស់ក្រសួងអប់រំ យុវជន និងកីឡា ក្នុងការពង្រឹង និងពង្រីកបច្ចេកវិទ្យានៅក្នុងវិស័យអប់រំ។ ស្ថាប័នអប់រំ អិន ធី ស៊ី គ្រុប ត្រូវបានគេដឹងថាបានខិតខំប្រឹងប្រែងយ៉ាងសកម្មក្នុងការបង្កើតនូវវគ្គបណ្តុះបណ្តាលផ្សេងៗ ដែលស្របទៅនឹងគោលនយោបាយរបស់ក្រសួង ជាពិសេសគោលនយោបាយស្តីពីការអភិវឌ្ឍវិជ្ជាជីវៈគ្រូបង្រៀន ការលើកកម្ពស់គុណភាពការបង្រៀន និងការប្រើប្រាស់បច្ចេកវិទ្យាព័ត៌មាន និងទំនាក់ទំនងក្នុងការអប់រំ ព្រមទាំងបានគាំទ្រដល់ការអប់រំបែបពហុវិស័យផងដែរ៕